PUNTREIS vul ir vias novas cull’ustria

Las fatschas dils hosps dalla casa PUNTREIS e dil cuschinier Fatmir Spescha han adina puspei tradiu il venderdis, ch’ei eran surpri e cuntents cun quei ch’ei vegniu surviu. Oravontut ils «Raviolis da capuns» han fascinau las buccas finas (La FMR ha presentau il cudisch la mesjamna vargada).

Il cuschinier drova sfidas

Gia ussa ein hosps d’ordeifer beinvegni ell’ustria dalla casa PUNTREIS che porscha era caterings e menus per fiastas da famiglia, nozzas ed auter. Sco Gian Reto Nufer ha tradiu il venderdis, puprogna Fatmir Spescha las cussadentas ed ils cussadents cun sia cuschina. El drovi denton ina sfida speciala. «Perquei lein nus arver aunc pli fetg noss’ustria e porscher ina gastronomia d’events», aschia il menader dalla casa PUNTREIS. L’idea seigi tuttavia buca quella da concurrenzar ils menaschis ella regiun, mobein d’offerir enzatgei spezial. «Jeu less porscher deletgs gastronomics ed inscenar quels a moda speciala. Quei sa esser cun preparar el liug, cuschinar ordaviert sil fiug ni era cun survir en vischala nunusitada ed autras surpresas», declara Fatmir Spescha che ha per exempel surviu ina suppa da zetgas en crosas dad ovs.

Tut dalla regiun e fatg en casa

Products fini han piars nuot ella cuschina dalla casa PUNTREIS. Fatmir Spescha fa tut quei ch’ei pusseivel sez, naven dil paun e la tuargia entochen tier la pasta ed il bouillon. Ils animals cumpra el da purs dalla regiun. «Pil solit visetel jeu ils purs ed enquerel ora ils animals aschia ch’jeu enconuschel els avon ch’ei vegnan ella cazzetta», di il cuschinier che ha gia cuschinau en pliras ustrias e hotels da renum, il davos en Val sogn Pieder. Regiunal e stagiunal ha per el ina gronda muntada. Impurtont ei senza dubi era ch’el fa sia lavur cun bia cor, perschuasiun e pissiun e quellas ingredienzas drov’ei probablamein era per cuschinar ils recepts ch’ein d’anflar en siu cudisch. Autruisa vegn ei strusch a gartegiar.