Prest duei la casa da scola a Sumvitg esser occupada cumpleinamein

Avon strusch treis onns ha il suveran da Sumvitg decidiu da nezegiar ina part dallas stanzas dalla casa da scola a Sumvitg per habitaziuns. 2019 ein duas habitaziuns da 2½ stanzas ed ina da 3½ stanzas vegnidas realisadas ed affittadas l’emprema ga. En in plum han ellas saviu vegnir occupadas a persunas sut 30 onns. Dapi lu ha ei dau midadas, mo igl ei mai stau in problem d’occupar danovamein las habitaziuns. «Questa stad ei ina habitaziun vegnida vita, mo treis dis suenter haver publicau ella eis ella gia stada reservada», di il canzlist communal Fabian Collenberg.

Ulteriur spazi da habitar

Sin fundament da quei interess e success, mo era pervia da pliras stanzas ch’ein aunc adina vitas, han la suprastonza communala e la cumissiun incaricada per quei intent fatg ponderaziuns da scaffir novas habitaziuns. La finamira ein duas habitaziuns grondas da 5½ stanzas adattadas per famiglias. Ils plans e visualisaziuns dil project ein stai publicai ils davos meins silla homepage dalla vischnaunca e sco quei che Fabian Collenberg di, ei igl interess persuenter gronds: «Nus havein giu resuns fetg positivs da pliras varts. Quei ha animau nus da cuntinuar la lavur e concretisar il project. Quei ei succediu cul biro d’architectura Spacial Design GmbH da Patrick Rothmund.» Per las duas habitaziuns grondas duein stanzas ell’empema alzada dalla casa da scola survir. La surfatscha da habitar dallas duas habitaziuns ei calculada cun mintgamai rodund 160 meters quadrat.

Decisiuns ils proxims meins

«Il mument vegnan ils detagls dil project sclari dalla cumissiun cugl architect. La summa previda persuenter vegn allura integrada el preventiv dalla vischnaunca per 2022. Aschilunsch che quel vegn acceptaus dils convischins quest atun vegn il credit suttamess al suveran probablamein il mars», declara Fabian Collenberg. Passa quel las tortas eis ei previu d’entscheiver ladinamein cullas lavurs e terminar quellas encunter la fin digl onn vegnent. Tenor empremas calculaziuns vegn la transformaziun da quellas stanzas da scola en duas habitaziuns grondas a custar rodund 980 000 francs.

Far guotas cun tgau

«Sche nus lein far precontracts cun eventuals affittaders stuein nus haver enzatgei concret enta maun. Quella fasa marscha il mument», puntuescha Fabian Collenberg. La finamira eis ei d’occupar las duas habitaziuns cun interessents dalla vischnaunca da Sumvitg ni era da loghens vischinonts: «Impurtont eis ei ch’ei detti veta, sco quei che tschellas habitaziuns novas en casa da scola han era dau.» En ina proxima seduta vegn la cumissiun preparatoria a sefatschentar denter auter dil prezi pil tscheins per las habitaziuns. In’autra damonda che savess forsa esser delicata ei a tgi che las habitaziuns vegnan affittadas. «Ei dat plirs interessents concrets. Jeu quentel ch’in ni l’auter segli forsa aunc giu. Cass cuntrari stuein nus fixar in clar proceder.» Las habitaziuns duein buca esser luxuriusas. Ellas duein esser d’in bien standard e surtut pagablas pils affittaders.

Ina plivalur per la vischnaunca

Ton il canzlist communal Fabian Collenberg sco il president communal Armin Candinas ein claramein dil meini che l’investiziun en habitaziuns en casa da scola a Sumvitg ei mo d’avantatg per la vischnaunca: «Dad ina vart occupein nus stanzas ch’ein vitas. Da l’autra vart purschin nus spazi da habitar a famiglias e procurein aschia per veta el vitg. In ulteriur avantatg ein denton era las entradas che la vischnaunca ha cheutras. Las investiziuns sepagan.» Pils affittaders cun affons ha igl areal dalla casa da scola a Sumvitg avantatgs. Aschia dispona quel da bia plaz e pusseivladads da sport, giug e termagliar.