Igl Kurhaus Barvogn e sies cumbat per l’existenza

Igl hotel Kurhaus Barvogn exista siva digl 1906. Chest onn è nia edia en codesch cun la lunga istorgia digl hotel. Sen 269 paginas vignan descretgas las difficultads e schanzas digl hotel durant igl davos tschentaner e chegl surtot cun ena massa illustraziuns tgi fon gost da saveir daple. Igl hotel cun 85 tgombras e 120 letgs ò purschia en luxus considerabel per lez taimp – ed oz è el ena pardetga istorica.

En hotel da cura «hors catégorie» – biagia digl fallo taimp agl fallo li ma cun grond optimissem. Dus onns avant l’avertura digl hotel igl 1904 è la lengia digl tren tras igl Alvra stada fittada. Igls giasts dalla bassa e digl exteriour on betg ple gia muteiv da sa farmar a Barvogn per star sur notg. Na, els on pudia eir immediat an lengia directa tras igl tunnel digl Alvra vers la bela Nagiadegna. Oz, 115 onns pi tard è igl hotel Kurhaus Barvogn anc adegna en grand hotel ‹hors catégorie›, ma forsa per oters muteivs e cunzont perveia dalla sia istorgia turbulenta ed interessanta.

1906 avertura

Ansasez vess igl hotel lia darveir las portas igls 15 da zarcladour 1905. Ma igl termin è nia spusto plessas gedas cun esser igl project da biagier relativ ambizious. Igls 1. da fanadour 1906 è igl hotel alloura finalmaintg nia inauguro cun ena festa ed ena massa giasts. Ainten las medias era nia scretg tgi seia cò la speranza ed igl giaveisch tg’igl hotel vigna ad esser en imposant simbol pigl futur dalla Val Alvra. Venavant ins pudeva liger, tuttegna da tge vart tg’ins vigna ainten la vischnanca da Barvogn, da mintga mang niro l’igleida a tutgier gl’amprem igl nov hotel.

Ma la partenza digl hotel è betg reuscheida scu giavischia. Er sch’igl hotel ò purschia en scoldamaint central, gleisch electrica, en ascensour, ena gronda sala da magler, plessas terrassas grondas, ena bar, ena meisa da billard- blers giasts èn tuttegna betg sa farmos a Barvogn mabagn pir ainten la Nagiadegna. Da chel taimp lò èn er nias biagias ena massa novs hotels ainten la val da l’otra vart digl Alvra. Uscheia ò igl hotel Kurhaus schon gia en defizit da 33 800 francs alla fegn digl onn 1906. Tge bel cumainzamaint per en hotel!

arsa e vendita

Igls 08 d’avost 1949 ògl do ena gronda arsa aint igl hotel. Cunchegl tg’igl favogn buffava zont ferm chel de è da supponer tgi ena brastga ò tanschia per caschunar igl fi. Siva dalla arsa è igl hotel nia scretg or per vender. Ma pir passa en onn pi tard ò igl cumegn da Barvogn cumpro igl hotel destruia. Blers indigens on gia igl giaveisch tg’igl hotel resta ena part dalla vischnanca. L’ideia era er cò da sbuar igl hotel. Cunchegl tg’igl è betg nia renovo ena massa chels onns era igl hotel pitost davanto ena spelunca e siva la curta fasa da sanaziun ò igl cumegn vandia la tgesa alla Uniun d’albierts per famiglias. Siva digl onn 1952 on chels mano la tgesa cun success scu tgesa da vacanzas e chegl 50 onns. Durant chel taimp è pero nia tralaschea igl mantignamaint digl bietg. La fatscheda ò antschet a romper ed igl tetg ò antschet a correr.

2002 – igl salvamaint digl hotel

Siva dalla compra digl hotel per 1.5 milliuns francs antras la Kurhaus Barvogn SA on da neir fatgas differentas renovaziuns aint igl hotel. Ainten tschertas stanzas è igl plafung nia cuvert cun plattas da lenn. Chellas vignan stratgas giu per vaseir puspe igl plafung original picturo cun motivs da rosas. La renovaziun dalla sala da magler an stil floreal (Jugendstil) è stada la pi pretensiousa digl antier hotel cun costs da passa 350 000 francs. Igl salv è nia inauguro fegn december 2003 cun ena gronda festa noua tgi l’antiera populaziun da Barvogn è stada anvidada. Agl architect ègl reuschia da transfurmar igl hotel siva mang ainten chegl tg’el era eneda, igl onn 1906. Mobiglia e differents objects vigls ins ò catto sen igl sotigltetg digl hotel noua tg’igl èn nias tignias se tot chels onns.

2012 hotel istoric digl onn

Igl onn 2012 è sto en onn da success pigl Kurhaus Barvogn. El ò survagnia igl premi digl hotel istoric digl onn per la cunsenztgousa restauraziun pass per pass. Cun prancepis dalla tgira da monumaints ègl reuschia da mantigneir substanzas originalas tgi èn ena gronda retgezza istorica.

Igl codesch Kurhaus Barvogn è nia scretg da Giaco Schiesser, Roland Flückiger-Seiler e Corina Lanfranchi. Per las illustraziuns è sto responsabel Ralph Feiner.

269 paginas cun l’istoriga digl hotel Kurhaus.

Gio 115 onns exista igl hotel Kurhaus a Barvogn. El ò survivia dus gheras mundialas ed ena arsa.

La sala da magler è oz populara per festivar nozzas.