Il tip: Peter Lustig e ses auto electric

Peter Lustig è stà enconuschent per sias invenziuns e curiusitads durant sia emissiun «Löwenzahn». I na fa betg surstar che l’um cun chautschas cun bistet preschenta gia l’onn 1983 plain luschezza ses auto electric. I sa tracta dal model «Elektro-Golf I» – in project ch’è vegnì lantschà l’onn 1976 da la firma Volkswagen. Il «Elektro-Golf I» era in’emprova ed ina reacziun sin la crisa d’ieli surventschida.

Durant l’emissiun «Nur ein Tropfen Öl» da Peter Lustig datti ina sequenza ch’è accessibla sin YouTube. In camiunist d’in auto-cisterna che n’ha sez nagin benzin pli dumonda Peter Lustig che sesa en in Golf verd per in zic benzin. Lez na sa betg gidar vinavant – quai che fa smirvegliar il camiunist. La raschun: Ses auto saja in auto che va senza benzin.

Peter Lustig avra il viertgel dal motor e mussa en pe d’in motor be batterias. Tenor il stand da lez temp sa tracti da 16 accus da plum cun sis volt ed in motor electric a current cuntinuà (Gleichstrom-Elektromotor). Peter Lustig preschenta ina tecnica da chargiar fitg antica: sur ina normala bischla da contact cun 220 volt che sa chatta là, nua ch’ins emplenescha normalmain il benzin. Dal reminent ina chaussa ch’ha durà radund 12 uras e tanscheva be per ina curta distanza.

La tecnica ed il svilup dals autos electrics eran da lez temp anc a l’entschatta, uschia che la sequenza fa surrir. Tuttina – vi dal princip fundamental n’è betg sa midà ina massa. E la tecnica è sa sviluppada uschia che l’auto electric funcziuna ozendi.

La discussiun davart la producziun d’electricitad che Peter Lustig maina cun il camiunist è dentant enfin oz d’impurtanza. La sequenza finescha cun ina pretensiun da Peter Lustig: «In bel di, sche nus inventain e ponderain, vegnin nus forsa a savair rabagliar davent tut quels ‹stinchers da benzin› da la via.»