«Wir schaffen das!»

I dat trais pleds che vegnan a restar en memoria da si’èra politica: «Wir schaffen das». Quai ha la chanceliera federala tudestga, Angela Merkel, ditg repetidamain l’onn 2015 en connex cun la crisa da fugitivs en Europa.

Bainprest va quest’èra da «Wir schaffen das» a fin. Sin la fin dals 16 onns regenza dad Angela Merkel ha la ARD realisà ed emess avant duas emnas ina docu-seria cun il titel «Merkeljahre». Igl è ina seria en trais parts da mintgamai var 30 minutas (da chattar online sin la ARD Mediathek). En quella seria vegnan recapitulads anc ina giada tut ils 16 onns che Angela Merkel è stada a la testa da la Germania.

E precis uschè nunspectacular e factic sco che Angela Merkel è savens sa preschentada, uschè simpla e bunamain sitga è questa documentaziun. Ils fatgs e schabetgs vegnan raquintads cronologicamain, pass a pass, lung las grondas crisas durant sia regenza: la crisa da bancas dal 2008, la crisa da fugitivs dal 2015, la crisa da corona actuala. I vegnan a pled bleras concumbattantas e divers concurrents politics. Mo ina persuna tascha: Angela Merkel sezza. Probabel n’ha ella betg vulì commentar u valitar ses agen temp da regenza. Perfin in da ses concurrents politics a l’intern da la «Union» sto admetter a la fin da la documentaziun: «Ella vegn a mancar!»

Ord perspectiva «estra» è la docu-seria da la ARD forsa memia tudestga. Vul dir la tactica politica interna e las tensiuns aifer las partidas survegnan bravamain plazza, gist p.ex. en cumpareglia­ziun cun las discussiuns e sfidas cun las trais grondas crisas mundialas dals davos 16 onns. I ristga tranteren perfin da vegnir lungurus per in aspectatur svizzer.

Però tgi che vul trair en memoria anc ina giada quests davos onns da la politica tudestga, cun ina persuna ch’è stada ina constanta sin il palc politic mundial, a quel u quella saja mess a cor la docu-seria «Merkeljahre». Tgi sa – forsa vegn Angela Merkel a mancar.