Fiutscher 2021 senza program accumpagnant

L’exposiziun Fiutscher sa drizza als scolars dals davos trais onn da la scola obligatoria. La gronda part da las scolas grischunas sajan s’annunziadas e sa participeschian ils proxims dis, ha Jürg Michel dal comité d’organisaziun da la Fiutscher ditg a la FMR. «Nus vegnin a reparter bain las visitadras ed ils visitaders sur l’entira surfatscha da l’exposiziun e nus vegnin ad accumpagnar els.» L’exposiziun da stans saja fatga precis medemamain sco ils ultims onns. En l’exposiziun vegnan preschentadas tar circa 80 stans 140 furmaziuns (professiuns) e 250 furmaziuns supplementaras

Auter èsi quest onn tenor Jürg Michel, ch’ina dat naginas occurrenzas accumpagnantas. «Nus na dastgain betg far in program accumpagnant pervia da la situaziun epidemoligica actuala.» Medemamain datti nagin stan d’alimentaziun a la Fiutscher da quest onn. Sco quai che Jürg Michel ha ditg, haja ins mess en pè ina tenda da l’autra vart da la Via da la caserna, nua ch’ins retschaiva ina pitschna purschida d’alimentaziun e bavrondas. «Persunas da 16 onns ston preschentar lur certificat. Ils pli giuvens ston pudair cumprovar il test da scola.»