Advent tarlischont a Glion
«Nus essan fetg satisfatgs, ed jeu hai in plascher enorm co tuts separticipeschan», ha Céline Meury, la menadra dil ressort cultura da Surselva Turissem, manegiau quest’jamna. Ella ha rendiu attent allas activitads d’advent ch’ei dat las proximas jamnas a Glion.
Onn vargau haveva la populaziun, vischnaunca, uniuns ed instituziuns stuiu desister da tuttas occurrenzas che accumpignavan per ordinari gl’advent e Nadal a Glion. Uonn para la normalitad da returnar. Silmeins ein commerci, marcadonts, vischnaunca e tuts involvai motivai. «Bia resuns havein nus giu, il november e december dat ei veta a Glion», remarca Céline Meury cun in grond surrir. Ella coordinescha las occurrenza ed ei en contact cun tuts. La sonda dils 27 da november entscheiva il temps festiv culla fiera d’advent. Per quella quentan ins puspei cun 80 stans da products ed attracziuns.
Spassegiada da famiglia e calender d’advent
L’emprema fiera d’advent a Glion ei stada ils 28 da november 1997. Igl era buca stau ina sonda, mobein in vedergis. La populaziun ha saviu spassegiar tras ina retscha cun 17 stans. Igl ei stau l’entschatta d’activitads festivas d’advent tochen suenter Daniev cul concert dalla Kammerphilharmonie dil Grischun. L’installaziun dil grond pigniel silla plazza-cumin ei il signal dallas activitads.
Ier gievgia han ins montau il pigniel digl advent 2021. Il helicopter ha sgulau quel giu digl uaul da Ruschein. Per la fiera d’advent dils 27 da november vegn el ad esser decoraus festivamein. La vischnaunca organisescha la fiera en collaboraziun cull’Uniun da commerci e mistregn Glion e contuorn. Era l’uniun fiera jamnila ei participada, quella haveva iniziau avon 24 onns l’occurrenza.
Surselva Turissem ei responsabla per la spassegiada per famiglias el marcau vegl. Affons e geniturs san far ina girada e tedlar en otg loghens historias e canzuns. Vinavon separticipeschan 24 fatschentas e stizuns da Glion allas finiastras d’advent. Quella purschida ellas vitrinas san ins medemamein cumbinar cun in spassegiada suenter ni avon tscheina. «Nus essan aschi leds e satisfatgs», manegia Céline Meury dil retuorn alla normalitad. In’occurrenza che ha s’udiu duront onns tier gl’advent da Glion maunca: il marcau da praulas dall’emprema dumengia dil december. Tuttina ei Céline Meury plein entusiassem e finescha: «Il november e december dat in bi matg d’occurrenzas. tuttina anavos bia tarlischur a Glion».
Gust da leger dapli?