Igl biegia-punts da Lantsch

Igl po esser en sentimaint intschert, tranteraint zont malampernevel sch’igl antscheva a ballinar cun viandar sur punts pendentas. Betg uscheia per David Baselgia – la sia veia magna sur varsaquantas punts, seia chegl ad Alvagni u perfign an Indonesia. Igl è la professiun e pas­siun da David Baselgia – construeir punts ni rampars ainten lis pretensious. «I dat mastiers tgi on nigna perspectiva, tg’èn simplamaintg ena giassa orva», dei igl om tgi ò oz 61 onns aint igl discurs cun la FMR. Avant 25 onns è igl anteriour selvicultour perchegl sa decidia da bandunar la giassa orva.

Bandunar la giassa orva

Igl era ena sonda dumang cura tgi David Baselgia ò ligia ainten gasetta en inserat: en plan directiv ed en pêr filosofias – insero d’ena fa­tschenta da biagier. Chegl è sto igl mument decisiv per David Baselgia tgi veva da lez taimp 37 onns e luvrava gio 14 onns scu selvicultour ainten la Val Müstair. «Nous eran ansasez bagn integros, la mia donna ed igls noss unfants. Ma scu selvicultour ainten la Val Müstair èn las perspectivas forsa en po limitadas», rachinta David Baselgia. Igl om tgi è carschia se a Lantsch è sto persvadia da chel inserat e dalla filisofia digl inserent. «En de siva vaia telefono alla fatschenta da biagier e detg, tg’ia less gugent biagier se ensatge per lavours cunter prievels dalla nateira», rachinta David Baselgia. Ansemen cun la sia donna e lour unfants ò el la fegn settember 1997 pacheto la valischa, detg adia alla Val Müstair e pass per pass biagia se ena fatschenta tgi chinta oz radond 70 collaboratours. Ena decisiun, tg’el n’è anfignen oz betg s’anriclo.

Incumbensas internaziunalas

Scumanzo cun chella lavour ò el igls 1. d’otgover 1997: En biro simpel e veid. David Baselgia tschainta per l’amprema geda agl pult scu ampluia d’ena fatschenta da biagier. «Alloura vaia antschet a stibgier, tge fatscha ossa cò?», rachinta David Baselgia. Plang a plang è el sa profundo alla lavour cunter prievels dalla nateira, ò savia profitar dalla saveida scu anteriour bostger e selvicultour ed igls sies contacts.

La firma tgi sa nomna aint igl frataimp Cre­stageo ed è domicilada a Coira, construescha rampars cunter lavegnas u cunter crappa e realisescha punts pendentas – e chegl pigl antier mond anturn. Da taimp an taimp vignan cargeas igls camiuns ed enqualtgi luvrant da David Baselgia carescha schizont direcziun Grezia, Mazedonia u Albania per construeir rampars cunter crudadas da crappa, sch’igl stò esser cun ageid da helicopters digl Grischun. «Chegl è ena dumonda dalla saveida. Cò ischan nous an Svizra simplamaintg en grond pass davantor e perchegl savainsa er exequeir lavours ainten oter paeis», accentuescha David Baselgia.

Punts passa 500 meters lungas

Avant dus onns ò David Baselgia do giu igl timung ed è sa concentro sen la spartiziun interna tgi construescha las punts pendentas per ­viandar. «Chegl è pi interessant da far», rachinta el cun en surreir. David Baselgia è creader e realisader. «Sviluppar en’ideia e la realisar», uscheia circumscreiva el la sia passiun. La fatschenta Crestageo construescha las pi lungas punts pendentas ansomma, cun lunghezzas anfignen 600 m. «I dovra simplamaintg fitg bler taimp. Dall’ideia anfignen tar la realisaziun so chegl eir passa diesch onns», dei David Baselgia.

Tgirar igl contact cun la patria

David Baselgia stat oz a Favugn, è pero savens anc d’antuppar ainten la sia patria a Lantsch, sei igl per tgirar contacts famigliars e socials u per eir a tgatscha. Pero er la sia lavour igl ma­gna adegna puspe an Surmeir: la punt pendenta sper las aclas dad Alvagni, la punt da Bardella a Marmorera, la sagliantada digl crepel a Solas e la punt da Vasternos sur Lantsch. Betg d’amblidar: Tot veva antschet cun en simpel inserat ena sonda dumang ainten gasetta.