Total local 21, nova exposiziun

Dapi che la Cularta a Laax ei s’aviarta la fin da november 2018 eis ella seprofilada ed ha saviu muentar bia. In’exposiziun suenter l’autra ei suandada. Gl’access agl art visual e figurativ, mo insumma la discussiun entuorn gl’art e la promoziun da quella sparta dalla veta humana, han retschiert ina dinamica surprendenta. En quei senn ei la Cularta dagitg ina instituziun. En quella organisescha la menadra Yvonne Gienal mintg’onn era in’exposiziun da gruppa. All’emprema eran otg artistas ed artists separticipai. Pli tard ein ulteriuras suandadas. Ils 27 da november 2021 arva la proxima exposiziun da gruppa cul tetel «Total local 21». La promoziun digl art e dallas artistas e dils artists dalla regiun stetti ad el fetg a cor, scriva la Cularta en ina communicaziun da medias. «Total local dat ina survesta davart la lavur actuala dallas artistas e dils artists dalla regiun maneivla», san ins leger ella communicaziun. Ovras dallas suandontas e dils suandonts ein da veser alla «Total local 21»: Daniela Cadruvi-Arpagaus, Ruschein; Markus Casutt, Flem; Leo Deplazes, Flem; ursula Huber, Laax; Nadia Hunziker, Flem; Stefanie Kälin, Laax; Sandra Kirtz, Laax; Ricarda Müller, Sagogn; Dorothea Jappe, Termin/Trimmis; Sandra Palaia, Glion e Thérèse Schmid-Jaquet, Fidaz.(fmr/abc)