«Sco sche jeu fuss mai stada naven»

La sonda vargada havess ins senz’auter pudiu crer che Vrin hagi lantschau il tscheiver. «Las Latiarnas» da Danis/Tavanasa ein bein sepresentadas en mondura  da tscheiver. Lur concert ha denton enramau la surdada ufficiala dalla pasterneria e caffé da Dante e Regina Caminada a Nadja Caminada e Sascha Dimmler. Casa Leon senumna il menaschi dapi l’entschatta settember cu ils novs possessurs han aviert las portas sut atgna reschia. E danunder vegn il num Casa Leon? «Nies fegl ha num Leon.» Nadja Camindada ei stada 17 onns ella Bassa e ha tradiu la sonda vargada da haver il sentiment da mai esser stada naven. «Jeu havess denton era mai saviu semaginar da turnar a Vrin.» Sascha Dimmler ei gia avon treis onns sespruaus da far gust a sia partenaria da surprender il menaschi da Dante e Regina Caminada. «La pandemia cun tut sias restricziuns ha segir dau a mi il stausch decisiv per dar adia alla Bassa.»

Plascher da  surdar

Plascher ha Vrin buca sulet giu dallas ritmicas dalla gugga la sonda vargada, mobien era che la pasternaria ed il café restan aviarts el vitg muntagnard entadem la Val Lumnezia. E plascher han era Dante e Regina Caminada ch’igl ei reussiu d’anflar ina successura ed ein successur. Igl  onn 1983 ha Dante Caminada baghegiau la pasternaria cun caffé, gest igl onn che la nova patruna da casa Nadja Caminada ei naschida. Buca meins che 38 onns ha Dante Caminada tgamunau il menaschi e 28 onns da cuminonza cun sia dunna Regina. Cun satisfecziun han els astgau surdar las clavs en in act simbolic a lur successurs. Bunamein quater onns sur la pensiun ha Dante Caminada luvrau e tonpli ein el e sia dunna ussa leds da guder in temps pli ruasseivel. La sonda vargada han Sascha Dimmler e Nadja Caminada envidau ils affons da lunsch e da maneivel da crear pops da pasta ella pasternaria. Biars affons cun lur geniturs han nezegiau la caschun da far ina viseta da Vrin e far printgas cun ils novs ed ils vegls possessurs dalla pasternaria ed il caffé da Vrin. Cun ils «grittibenz» e la musica da tscheiver ha Vrin lantschau la sonda vargada ton il temps da Sontgaclau sco il tscheiver.