Spargnau ina massa

«Vegnas venderdis giu Cuera cun mei, igl ei Black Friday», ha mia amitga dumandau tscheidi. Rabats da 10% entochen 70% ni perfin dapli carmalan. Tgi po aunc resister cheu? Jeu buc adina, ton sai jeu conceder. Tier venditas e rabats vegnel jeu bia memia savens fleivla. Ed il Black Friday ei lu empau sco dad esser ella Tiara dalla Cucagna.

Gia il november dat ei ina massa per buns prezis ni bunamein per nuot. Ok, forsa ein ils prezis aunc adina buca buns e gnanc tec fairs, mo els ein in bienton pli favoreivels ch’il prezi normal. Sch’jeu cumprel pia in pullover che custass 300 francs per 150 francs hai jeu spargnau 150 francs e sai aunc cumprar in secund. Bein logic. Era sch’jeu havess mai cumprau in per 300 francs.

Ni ch’jeu cumprel mo in pullover e cul rest in parfum. Ei dat la fin­finala aunc ina ga il medem gratuit si suren. Schnäpplis nua ch’ins mira. Dil reminent hai jeu aunc adina in parfum dil Black Friday digl onn vargau. Adina san ins era buc metter si il medem. ­Atgnamein havess jeu duvrau caul­tschas avon in onn, anflau hai lu denton giaccas. Gie gest pliras, buca grad la colur giavischada, mo in tec flexibels ston ins schon esser il venderdis ner. Jeu less uss tuttina buca tradir tgei ch’jeu havevel tut cumprau, ei era denton dabia e consequentamein hai jeu era spargnau ina massa.

Lu hai jeu scret dil Black Friday che ha buca liug en Surselva ed ils tips dalla Fundaziun pil schurmetg da consuments  (mo mirei igl artechel e la boxa). Buns tips ed atgnamein era quei schon clar a mi ch’ei mondi aschia. Tuttina vegnel jeu adina puspei fleivla tier acziuns e venditas.

Mo gianteren, sun jeu buca pipa da star naven? Bein, mia amitga sto ir persula ni anflar autra cumpignia. Jeu hai liber e mon a spass – ella Tiara dalla Cucagna Surselva. E gie, sch’ei schabegia nuot nunprevediu sai jeu era dir questa sera d’haver spargnau ina massa.