Glisch verda per Nagens Sura ed Ils Cugns

Ei ha pariu ch’ei seigi ina formalitad, e lezza ha la Regenza grischuna lu era approbau: Ier ha ella communicau ch’ella hagi dau glisch verda per in’avertura dil territori da skis Flem-Laax. Da principi va ei buca mo per skis e sport d’unviern. La pendiculara nova vegn duvrada da stad e d’unviern, da Flem anora en direcziun pass dil Segnes e Cassons. La Regenza approbescha la colligiaziun nova encunter l’Arena tectonica Sardona denter Nagens e Cassons. La formalitad necessaria ein las revisiuns parzialas dallas planisaziuns localas da Flem e Laax. Las vischnaunca da Laax ha approbau quei ils 27 da mars da radunonza communala. Ils 13 da zercladur 2021 han ils da Flem approbau la revisiun necessaria all’urna cun 1112 gie encunter 155 na.

Martin Hug ha empermess

Aunc avon ch’entscheiver la procedura per la revisiun dil plan da zonas eran ils responsabels s’entupai cullas organisaziuns digl ambient. Tuttas instanzas eran secunvegnidas, aschia che la publicaziun ed exposiziun dils plans zonals la primavera vargada han buca evocau protestas. Avon prest in onn, cu il president communal nievelegiu Martin Hug ha surpriu siu uffeci, ha el empermess ch’el vegni a far tut il pusseivel ch’ins sappi entscheiver a baghegiar il 2022 ed arver la pendiculara nova silla stad 2023. Quell’empermischun sa el ussa ademplir. La lingia Flem-Foppa duei esser aviarta gia sigl atun 2022, silla stad 2023 vul la Cassons SA contonscher Ils Cugns.

Ina pendiculara da Flem direct sil Fil da Cassons vegn ei buca a dar, gliez era clar naven dall’entschatta. En ina emprema etappa vul la Cassons SA baghegiar la teleferica nova da Flem a Foppa, da leu a Startgels e vinavon tochen tier la Camona da Segnes. La societad-purtadra Cassons SA han la vischnaunca da Flem e la Gruppa Arena Alva, cun sustegn d’ulteriurs investurs, fundau aposta per realisar quei project. Suenter ch’ella ha ussa retschiert glisch verda, vegnan ins a publicar la damonda da baghegiar per l’emprema etappa Flem-Camona da Segnes-Nagens Sura.

Era pendiculara da latg da Fidaz

Las revisiuns dallas planisaziuns localas da Laax e Flem lubescha da realisar ina pendiculara nuninterrutta silla lingia Flem–Foppa–Startgels–Camona da Segnes–Nagens Sura e Camona da Segnes-Ils Cugns. Sco tier in ascensur en ina casa aulta san ils passaschiers ascender la gondla en ina dallas staziuns, smaccar il nuv per la destinaziun giavischada, la gondla sesarva automaticamein alla fermada. Al spartadirecziun Camona da Segnes vegnan ils passaschiers menai u encunter Nagens Sura el territori da Laax ni encunter Ils Cugns. Quella nova staziun finala ei situada rodund 200 meters sut il Fil da Cassons. Da leu anora han ins la stad access direct al Plaun Segnes Sura. Ad Ils Cugns eis ei previu da baghegiar in center da visitaders pils turists dall’Arena tectonica Sardona.

Cun lingia directa nova vegn il territori da Naraus perencunter descargaus d’implonts. La sutgera Foppa-Naraus vegn demontada, medemamein la pendiculara Startgels Grauberg. La Regenza ha dil reminent era approbau ina midada dil plan da zonas a Fidaz. Leu sto la vischnaunca remplazzar la pendiculara Fidaz-Crap da Flem che transporta rauba e latg dall’alp da vaccas.