Cun David Bowie in direcziun Nadel
In connex cul marcho da Nadel ho San Murezzan in dumengia zievamezdi inauguro la nouva projecziun da Nadel sün plazza cumünela. Suot il nom «Tales of a Tree» ho l’artist da Silvaplauna Oliver Conrad creo üna installaziun multimediela. L’installaziun da Nadel moderna po gnir visiteda mincha di fin al cumainzamaint schner 2022.
Dals 5 december 2021 fin als 9 schner 2022 as preschainta la fatscheda da la chesa cumünela da San Murezzan scu ouvra d’art animeda. Insembel cun bös-chs iglüminos, glüsch, musica e video dvainta la fatscheda da la chesa cumünela üna culissa chi quinta ün’istorgia da Nadel interstellara.
Space Oddity
L’animaziun es gnida realiseda in möd da teater da marionettas. Las marionettas, chi sun missas expostas illa infurmaziun da turissem, sun resüstedas digitalmaing a maun d’ün greenscreen. L’istorgia vain projecteda cun 4K-projectors da video our d’üna staunza i’l Cafè Hanselmann. Mincha di di da las 17.30 a las 22.00 as po ir a guarder l’istorgia da Nadel fin als 9 schner 2022.
David Bowie e sieu chanzun «Space Oddity» staun i’l center da l’animaziun. Intuorn la chanzun, üna registraziun d’ün cor d’iffaunts, vain quinteda in bundant 30 minuts ün’istorgia da Nadel da l’otra sort. Las marionettas in fuorma da bes-chas our dals gods engiadinais, as mettan in tschercha da fragmaints d’üna staila chi scrouda e’s mettan in viedi i’l universum.Sper David Bowie vain l’istorgia accumpagneda da musica chi’d es gnida creeda specielmaing per quist proget. Ses artists haun cumponieu la musica davousvart e sun a ses sairas illa stagiun ota eir part da l’installaziun e live da la partida.
Ün artist premio
Il cho principel davous quist progets es il redschissur d’animaziun Oliver Conrad. L’indigen ho già lavuro i’ls Stedis Unieus scu illustratur e redschissur per films d’animaziun. Sias ouvras sun traunter oter mussedas a Berlin ed a New York. Dal 2017 ho’l realiso a Turich düraunt il temp d’Advent üna simila projecziun sül Paradeplatz. Per quella è’l gnieu premio cun ün EDI AWARD d’or, ün premi dal Departement intern pels meglders films d’incumbenza.
Tenor el es grattageda la premiera e la chesa cumünela spordscha eir üna culissa optimela per l’animaziun. Impustüt la fuorma dal tet, chi algorda ad uraglias da giats, haun attrat al reschissur. El tuorna eir adüna gugent in Engiadina. «Per me es que ün pô scu gnir a chesa, da pudair realiser quist proget. Eir scha nu stun pü cò es que fich bel da turner e mieus rischs sun propi cò», disch Oliver Conrad.
Las occurenzas cun live DJs e concerts haun lö a las seguaintas datas a partir da las 18.00: venderdi, 17 december cun Max Bunt, lündeschdi 27 december cun Georgina Hauser, mardi 28 december cun Mattoni Pazzi, marculdi 29 december cun SKOR, gövgia 30 december cun Kalabrese und das Rumpel Orchester (concert) e venderdi 31 december cun Balint Dobozzi (concert).
Gust da leger dapli?