L’istorgia digl asen

Igl asen ò purto Maria a Betlehem. Igl asen è er igl cumpogn tgi stat cugl bov dasper igl parsepen e contaimpla igl bambign. Er ia va en asen tgi gioia ena rolla ainten egna dallas mias istorgias digl taimp da Nadal. Per egna vaia en asen sen dus tgommas a tgesa. El è en asnung e fò asnareias, ergo en asen. Per l’otra ò chel asnung gia angal en sulet giaveisch per Nadal. En pischama, an furma dad asen. Cun capuza, cun ureglias lungas e davos en piz cua.

Betg igl mender giaveisch per Nadal, en pischama. Chel duess purtar igl bambign. Cun saveir tg’igl bambign ò savens blera lavour, vaia lia gidar. Va vurdo noua tg’ia pudess pustar en tal pischama dad asens. Bagnspert vaia catto ena pagina d’internet. En pischama an furma dad asen per mianc vantg francs. Va pusto e spitgia cun plascheir tgi chel pachet bandunga la China e vigna a Cunter. Tots dus antschevan cun en C. Chegl è bagn en segn.

Ozande ègl incredibel, a Cunter ins po suandar a moda digitala igl process da pacatar igl pischama, ins po vurdar cura tg’igl pischama bandunga la China e cura tg’igl pischama passa igl cunfegn svizzer. E sch’el è alloura eneda puso avant tgesa, dattigl perfign en messadi. Tot correct. Sung turnada a tgesa e va davert la stgaffa da brevs. Nign pachet. Sung eida ainten garascha a tschartger, nign pachet. Sung eida avant la porta sensom, nign pachet. Sung eida alla posta, va musso tg’igl pischama vess tenor las mias infurmaziuns dad esser a cò, els on pero catto navot. Tschartgea cun tot la bunga viglia, pero asens nign tg’ò via. Chel asen è mai nia anfignen tar nous. Persungas pi versadas ainten pustaziuns an China on perfign managea tgi chel asen vegia mai banduno la China, pessimists totals on perfign detg tgi chel asen vegigl mai do.

Igl bambign ò gia dad esser spontan e purtar ensatge oter. Pero chel pischama dad asen è returno er igl onn proxim sen la glista da giaveischs. Ena geda, è ni­gna geda. Va pusto anc ­eneda chel asen. Pero chest’eda sunga stada furbra. Va panso, tgi sch’igl amprem pachet seia ia a perder, saro chegl capito angal perchegl tg’è sto aint angal en pischama. Per tg’igl pachet davainta pi grond, vaia gist pusto anc gleischs pigl iert. Ed er cò vaia pudia suandar mintga pass digl mies pachet, ossa en pachet grond. L’ò banduno la fabrica ed ia agl cunfegn dalla China. Tge pomai ossa. Igl pachet è nia tarmess anavos alla fabrica. I vegian fadeias da lascher eir igl pachet sur igl cunfegn, igl cartung seia rot. Sung betg neida agitada. Anc spazi da taimp avonda anfignen Nadal. Pero chel pachet è mai ple nia tarmess vers la Svizra. Anc eneda nign pischama dad asens. Dus amprovas tg’èn eidas dalla glatscha giu. Ia va betg angal lia pustar en asen, ia crei tgi cò ò ensatgi fatg bravamaintg dad asen cun me.