«Bleras donnas na son betg noua metter prioritads»

Ellas ageschan e magnan, stattan pero davosnoda digls affars. Malgro tg’ellas n’èn savens betg digl fatg surpeglian donnas tgi èn an relaziun cun impressaris pensums administrativs da tot gener: correspondenza, communicaziun, fatgs digl personal ni contabilitad. Pero betg angal glez, schi ellas èn a madem taimp anc casarinas e mammas resultescha en pensum da lavour da 150%. L’Uniun grischuna d’artisanadi e mastregn porscha specialmaintg a chellas donnas ena scolaziun – professiunala scu er mentala.

Metter prioritads

Igl curs per la donna da fatschenta porscha a moda simpla la basa per pudeir far las lavours administrativas ainten en’interpresa da grondezza masanga. Igl curs cozza radond en mez onn ed ò li mintgamai en mez de l’emda. All’antschatta digl curs ò li en seminari da dus deis, el duess dar la pussebladad per en amprem barat tranter las participantas.

Pigl seminari d’introducziun da chest onn èn 19 donnas digl antier Grischun s’inscuntradas la fegn otgover a Lai aint igl hotel Schweizerhof. Sabina Wolf è responsabla per igl curs tgi exista gio siva da 25 onns. L’introducziun tematisescha tranter oter la fidanza da sasez e las atgnas fermezzas. «Bleras donnas na son betg noua metter prioritads ed on igl sentimaint da stueir surpiglier tot las lavours aint igl affar. Savens na son ellas er betg scu communitgier cun lour partenaris davart tgossas tgi pertotgan igl affar», dei Sabina Wolf.

Situaziuns individualas

Ainfer la gruppa sa mossan dantant grondas differenzas scu tgi las donnas tractan las atgnas deblezzas. «Nous vagn donnas fitg reservadas ed otras èn pi avertas e von per ageid, sch’ellas èn surdumandadas», dei Sabina Wolf. Varsaquantas donnas èn scoladas an oters camps e sa participeschan tuttegna agl affar digl partenari. «Nous vagn pero er donnas, tgi èn sezzas possessouras d’en affar. An general visitan las donnas igl curs cun gronda motivaziun per sa scolar e neir pi sieiras segls camps adminstrativ», dei Sabina Wolf.

75% digl tigneirtgesa

Dacurt ò la sociologa Franziska Schutzbach detg ainten en’intervista cun SRF, tgi donnas surpeglian radond 75% dalla lavour an famiglia e digl tigneirtgesa, a madem taimp lavouran ellas pi e pi per gudogn. Er Sabina Wolf observescha en tal svilup. «Chegl n’è pero betg angal en fenomen tar donnas tgi lavouran aint igls affars da famiglia mabagn an general», accentuescha ella. «Chellas donnas tgi visitan igl noss curs sa veian pero betg scu unfrendas mabagn fon ellas chegl da libra viglia ed èn prontas da gidar or e discarger lour omens», dei Sabina Wolf.

«Ins n’è betg suletta»

En punct central durant igl seminari digl curs è igl barat tranter las participantas: tadlar, rachintar, dar tips e profitar dallas experientschas dallas otras participantas e saveir profitar dalla ancunaschientschas practicas digls referents. «Tranteraint dovrigl angal en pitschen input. Igl fò simplamaintg bagn da vaseir, tg’ins n’è betg suletta ainten ena tala situaziun», dei Sabina Wolf.

Igl curs è dumando e vign per regla mano tras mintg’onn. Dantant sa dumonda Sabina Wolf, sch’igl fiss betg da darveir igl curs per tot igls genders. «Ia crei tgi las plessas donnas d’ozande èn scoladas migler tgi anc avant 25 onns cura tg’ins ò iniziia igl curs. Ultra da chegl vainsa er singulas dumondas dad omens tgi sa participessan gugent ad en tal curs», manegia Sabina Wolf.

«Igl mies om ò en affar da transports e danov vainsa en bed & breakfast, aint igl qual nous faschagn tot sez. Cun aveir amprandia fisioterapeuta vaia nign’ideia da biro e sieranzas. Digl curs spetga tg’el porscha la saveida da basa. Igl pi impurtant è per me pero igl barat tranter las donnas.»

«Ia surpegl differentas lavours da biro aint igl noss affar cun 18 luvrants. Igl curs ranfrestga las ancunaschientschas digl amprendissadi scu commerzianta e mossa, tge tg’è sa mido sur igls onns. Ultra da chegl pussibilitescha igl curs en barat cun referents ed otras donnas tgi dereivan mademamaintg dalla practica.»

«Siva da 20 onns managn igl mies om ed ia ena scrinareira ed ena pitschna buteia da mobiglia cun 13 collaborautours. Ia sung responsabla per l’antiera administraziun e correspondenza. Aint igl frataimp surpeglia perfign discurs cun cliaints. Ia na sung betg digl fatg cun aveir fatg ena scolaziun pedagogica. Ossa vaia finalmaintg peda per far igl curs tg’am porscha la basa per las mias lavour aint igl affar.»