Dus persungas giovnas

I vo anc seis meis anfignen tgi igl suveran grischun eligia la regenza ed er las persungas tgi appartignan per la proxima perioda da legislatura agl parlamaint cantunal. A chel less er l’Allianza digl center Alvaschagn venavant appartigneir, schi pussebel cun dus persungas scu anfignen ossa. Romano Paterlini da Lai, el tg’è siva digl 2014 deputo sa metta betg ple a disposiziun per ena candidatura. La raschung è tg’el è nia eligia an suprastanza digl cumegn da Vaz. Chel nov uffezi e la sia professiun scu agent da sieranzas lubeschan strousch da far er anc sen camp cantunal politica cun simplamaintg mantger igl taimp. Ultra da chegl vegia el er anc ena famiglia, ò menziuno igl deputo partent.

Cun persvasiun politicher

An preschientscha da cunsiglier guvernativ Jon Domenic Parolini, la deputada Gaby Ulber, circuit electoral Belfort, e la candidata dall’Allianza digl Center Surses Sandra Baltermia ò gia li la radunanza da nominaziun a Lai. Romano Paterlini è sa musso cuntaint tgi Reto Crameri da Surava, igl deputo actual sa metta a disposiziun per ena reelecziun. Igl giurist, notar e pour seia cun persvasiun politicher. El veiva per la politica, aint igl frataimp ins canoscha el er a Berna cun el far politica conform agls fatgs, reala e correcta. Cun aveir ples uffezis presidials, esser angaschea betg angal sen camp politic, mabagn er sen camp turistic, economic e social ins canoscha Reto Crameri scu ena persunga seriousa. Igl deputo da 31 onns e co-president dalla fracziun dall’Allianza digl Center ò detg tg’el candidescha gugent per restar venavant commember digl parlamaint grischun. Venavant less el s’angascher per las regiuns periferas e cunzont per ena buna colliaziun digl traffic public ainten chellas. Er ainten las regiuns periferas dovrigl bungas scolas e da gronda impurtanza seia mintga singula instituziun. Per tgi las regiuns periferas vegian en bung avigneir dovrigl er avonda e cunzont taragn da biagier paiabel, ò detg Reto Crameri. El seia er chel tg’unescha pitost igls martgeas cun la campagna tgi separar martgeas  e campagna.

Stada alla sessiun dallas donnas

Gia da renuztgier alla radunanza da nominaziun cun esser malsanga ò Luana Bergamin da Lai. Romano Paterlini el ò detg tgi l’Allianza digl center Alvaschagn dastga esser loscha da preschentar cun Luana Bergamin ena donna, ena candidata giovna, ena persunga fitg averta, communicativa e cun fermas relaziuns tigl sport, tar la scienza e tigl turissem. Via livestream ò Luana Bergamin detg tg’ella candidescha cun plascheir pigl Cunsegl grond. La donna da 36 onns è er stada avant pacas emdas alla sessiun da donnas a Berna e tranter oter er gia contact cun cunsigliera federala Viola Amherd e cun cunsiglier naziunal Martin Candinas. Stibgia ò Luana Bergamin scienza da sport ed economia publica. Vess ella da neir eligeida aint igl parlamaint cantunal less ella metter prioritads per ena miglra scolaziun e furmaziun, s’angascher per societads da tot gener, naturalmaintg er pigl turissem, pigl sport e betg igl davos er pigl bagn dallas famiglias. Er igl sistem ecologic aint igl turissem seia en tema tg’interessescha ella fitg, ò menziuno Luana Bergamin. Plagn motivaziun geia ella aint igl cumbat electoral e sa legra sen ena bunga collaboraziun cun candidats e candidatas dall’Allianza digl Center.