Guardar, scuvrir, surstar

Per tscherts products fan ins adina puspe cumparegliaziuns. Ins cumpareglia cassas da malsauns cun premias e prestaziuns. Il servetsch comparis.ch è in’adressa conuschenta en quest reguard. Blera glieud cumpareglia regularmain il pretsch da la vivonda dal mintga di. Ins cumpareglia ed examinescha cun l’intenziun da spargnar raps. Profitar qua e profitar là pon ins sulettamain cun congualar ils pretschs tenor las reglas da dumonda ed offerta.

La regla da cumparegliar vala er per la cumpra d’in auto, da mobiglias u d’auters products. Per pudair profitar ston ins cumparegliar. I dat anc autras furmas da cumparegliar. Dasper questas existenzialas e raziunalas datti er ina ludica e mediala. Tgi che rimna cartas postalas fa adina puspei novas experientschas e scuvertas cun guardar en sia collecziun. Quest hobi dat la pussaivladad da cumparegliar e da sa dumondar: co eri ier, co esi oz? Betg exnum la situaziun da viver. I va per la statica, per l’aspect. L’unica cundiziun è ch’ins haja plaschair da cumparegliar il maletg dal vitg, d’ina cuntrada u d’in quartier.

Cun guardar ils detagls sin las cartulinas da 120 enfin 100 onns pon ins cumparegliar las midadas. Questa funtauna n’era anc betg en quest lieu, questa chasa han ins renovà e la chasa dad oz era anc in clavà. Interessants detagls pon ins scuvir tar las cuvridas dals tetgs. La suletta cundiziun tar questa furma da cumparegliaziun è ch’ins prendia temp.