Maxli ei turnaus a Vrin
Dacuort ha la pleiv da Lumnezia retschiert in pachet si dalla Bassa. In pachet cun ina cavazza lien ch’ei vegnida allontanada avon 60 onns dil carner dalla baselgia da Vrin. Aschuntada al pachet era ina brev che descriva il destin dalla cavazza da Vrin.
Il pachet che deriva da Wettingen ei setschentaus dacuort sin meisa dil secretariat dalla pleiv da Lumnezia ell’anteriura canzlia da Cumbel. Ina pleiv che cumpeglia ils vischinadis da Cumbel, Peiden, Camuns, Tersnaus, Uors, Surcasti, Lumbrein, Surin e Vrin e che vegn presidiada dad Alexander Casanova.
Il secretari dalla pleiv, Fidel Arpagaus, ha mess il pachet sin meisa dalla stanza da sesida cun in cedel e l’indicaziun: «Surpresa per Alexander». Alexander Casanova e ses cunsuprastonts ein buca stai pauc surstai enaquella ch’els han dau in’egliada el pachet. Enstagl dils creflis ch’il president dalla pleiv ha spetgau ha el viu el pachet ina cavazza.
La brev aschuntada al pachet sedrezza al secretari dalla pleiv. «Preziau signur Arpagaus, jeu vai ussa 76 onns ed il destin dil Maxli schai a mi sil magun. Schebein che jeu sun aunc da buna sanadad less jeu buca che la cavazza vegness destruida senza cor e fiersa naven suenter mia mort.»
L’autura dalla brev ei cunscienta dalla surpresa che siu pachet vegn a caschunar alla pleiv da Lumnezia e perquei declara ella il viadi ed il destin dalla cavazza. «Avon biabein 60 onns ha miu frar fatg ina tura da velos cun collegas ed els han era contonschiu Vrin.»
L’autura scriva dad in nunperduneivel levsenn dils giuvenils e da siu frar ella vegliadetgna da 17 onns. E descriva ch’ils giuvenils ein seduvrai tard viaden ella notg cun in untensil vid il curnisch da cavazzas dil carner dalla baselgia da Vrin. «Ina cavazza da quei curnisch ei curdada els mauns dils giuvenils e miu frar ha priu cun la cavazza a casa.»
La cavazza ei daventada in mied d’instrucziun
Tenor las explicaziuns dalla speditura dil pachet ed autura dalla brev ha la cavazza passentau ils emprems onns ella Bassa sil surcombras dils geniturs. «Cunaquei che jeu sun stada ina engaschada scolasta hai jeu priu la cavazza cun mei en scola e duvrau ella, cun dueivel respect, ell’instrucziun.» Tenor las indicaziuns dalla scolasta han ils affons mai giu tema ni sgarschur dil relict dil carner da Vrin.
Els han para tractau il Maxli – quei num ha la cavazza daferton retschiert – cun respect e smarvegl. «La cavazza da Vrin ha accumpignau mei pliras gadas cu jeu hai midau domicil ed il Maxli ha adina giu siu plaz en mia stiva.» Sco ei para ei in student dalla medischina inaga sefatschentaus cun la cavazza da Vrin. Cun intercurir il relict ei la fina staffa curdada ord l’ureglia dalla cavazza. «Ella ei vegnida elavurada tier in penderletg.»
Maxli duei turnar en siu liug d’origin
Via ina emissiun da televisiun ei il frar dalla autura dalla brev tuttenina seregurdaus dil malfatg commess avon 60 onns a Vrin, cun 17 onns. «Scocamai ei miu frar staus promts da confessar siu malfatg e da turnar persunalmein cul Maxli a Vrin.»
L’autura dalla brev scriva che la sanadad lubeschi momentan buc al frar da far quei viadi. «Aschia che jeu surprendel ussa l’incarica da tarmetter la cavazza aschidengi a casa.» L’autura dalla brev finescha sia brev cun la supplica da porscher al Maxli siu plaz d’antruras.
E quei vul la pleiv da Lumnezia era far, sco quei ch’il suprastont Armin Caviezel ha dau d’entellir. «Jeu creigel che negin hagi enzatgei encunter.» A caschun dad ina sentupada dalla FMR cun Armin Caviezel ed il Maxli sin il santeri da Vrin ha il suprastont dalla pleiv gia enderschiu in encarden el curnisch da cavazzas nua ch’il Maxli savess puspei retscheiver siu plaz ella retscha. Forsa schizun el liug nua ch’el sesanflava avon 60 onns.
Gust da leger dapli?