Paun frestg silla panera

L’jamna vargada e questa ha il tgamin ella cuort dalla casa pervenda catolica a Sagogn fimau. In segn che Petra Cavelti-Arpagaus ei en acziun. Dapi zacons onns drova ella il pistrin per divers projects cun affons. Aschia ha ella fatg ils davos gis paun culs premcommunicants da Sagogn e Schluein. Ella ha era introduciu ina gruppa d’affons d’in luvratori dil Museum regiunal Surselva ella savida da far paun. Quei che s’udeva pli baul tiel mintgagi da scolars primars ei tuttavia buca pli present, seigi lu a carschi sco affons. Ins cumpra il paun frestg en stizun, co quel vegn fatgs va pli e pli en emblidonza.

Il pistrin ella cuort dalla casa pervenda ei adattaus per gruppas, cunzun demai ch’il stabiliment ei buca situaus sper ina via cun traffic. Ils affons san luvrar concentradamein e s’approfundar ella pratica. Petra Cavelti, versada pedagoga e casarina, haveva prescaldau il fuorn da lenna. Pil luvratori da far paun ha ella buca priu la pasta finida, zugliau quella e mess en fuorn. Ils affons han schizun astgau mular sezs la frina. Cun aua, levon e sal han els lu turschau la pasta per far il paun-ragisch. Cu la furnera haveva mess ils pauns crius silla pala e stuschau en els, ha ei dau ina pausa. Duront quella han ils affons astgau sgarar ora il briec e metter ils paunets crius oradem. Tal paun ha ferdau e gustau pli che excellent. Ils affons ein stai incantai dall’instrucziun pratica. Ils pauns che la menadra ha priu ord il fuorn ha ella mess silla panera e schau sferdentar. Aschia san ils affons ussa buca mo co ins fa paun, mobein era tgei ch’ina panera ei. Igl ei il cundrez ch’ins drova per deponer e schar sferdentar il paun calira. La panera da lenn pendan ins si en in liug cun distanza segira dallas miurs. Buca mo carstgauns pigns e gronds ein incantai dil fried da paun frestg ord il fuorn.(fmr/abc)