Igls misteris ainten codeschs vigls

Mesemda, igls 19 da schaner on set unfants fatg part all’amprema occurrenza digl onn giubilar dalla Biblioteca populara da Savognin. Instruias da maniera cumpetenta da Ricarda Graf e cugl ageid dallas bibliotecaras Nora Netzer e Sabine Vinzens, onigl zambargea ena trocletta da scazis ainten codeschs vigls. Da chella maniera pon neir salvos tals codeschs, tg’èn nias ligias gio tantas e tantas gedas, da neir dismess aint igl palpieri vigl. Cun ageid da cuntels gits e cola on chels oramai survagnia en nov intent.

Cun fascinaziun e perseveranza èn tot igls unfants sa mess alla lavour. Igl amprem pass è sto chel da tagler en tgavortg aint igl codesch, per obtigneir en tgoz per zuppar igl scazi. La lavour d’antagler chel tgavortg rectangular cun cuntel e schablona ò cuzzo passa en’oura. Tranteraint onigl ampruo adegna puspe, sch’igl Sugus vegia gio plaz aint igl tgoz e schi chel seia gio profond avonda per pudeir zuppar liaint en scazi.

Alloura ègl sto ouras da far la pôssa bagnmaritada e galdeir ena pitschna marenda. Siva onigl gia da cular las paginas dalla largia, da maniera tgi detta en bel tgoz per zuppar igls misteris.

Tge sorts da misteris tgi niron zuppos ainten lour tgozs, chegl resta naturalmaintg en misteri. Mademamaintg en misteri resta la dumonda, ainten tgenegn digls codeschs tgi dat en tgoz misterious. Perchegl èn las participantas ed igls participants digls curs da vaseir sen la fotografia finala sainza lour codeschs tgavrias.

La manadra digl curs, Ricarda Graf, e las bibliotecaras èn stadas satisfatgas digls resultats digls mangs anschignevels dallas scolaras e digls scolars tgi on fatg part all’amprema occurrenza digl onn giubilar dalla Biblioteca populara da Savognin.