Cura ch’in «Cristbäumle» era ina sensaziun

parter

Pils affons ei il gi dils 24 da december in magic enteifer gl’onn. Igl ei la vigelgia da Nadal ed els astgan selegrar dil pigniel ch’il Bambin porta e dils pacs che quel depona suten sper la stalla. Buca per nuot ei Nadal la fiasta dalla legria e dalla ventira. Far e/ni retscheiver in schenghetg ei cumbinau cun plaschers, deletgs e bialas emoziuns. Pli baul era quei perinagada aschia. Da miez unviern, ch’igl era stgir e ch’ins spitgava vess ch’ils gis creschien, fageva in schenghetg effect. Ed ins saveva sefidar dil Bambin.

Gl’usit dils schenghetgs e dil pigniel ch’il Bambin porta ei gnanc schi vegls. Quei cumprova ina notizia dalla Gasetta Romontscha dils 31 da december 1859. Avon 165 onns ha quei organ rapportau d’ina «remarcabladad maisudida en Lumnezia». Ils affons da scola a Lumbrein seigien vegni surpri da dus stupents «cristbäumles». La gasetta ha derasau la novitad da dus pignieuls ornai ed illuminai cun regals per scadin affon. Igl era stau ina novaziun ella vallada, e quella ei semantenida tochen oz.

La «moda» dil Bambin che vegn cul pigniel ei s’etablida daferton. Ella ei denton semidada dil taliter. Ella fa buca pli quei effect d’inagada. Deplorablamein ha la glischur da quels gis piars sia magia. Gia la fin d’october entscheivan illuminaziuns e cazzolas ad enzugliar e reclamas a mulestar nus. Cadeinas e ghirlandas vid tschabergals ed entuorn finiastras impedeschan che nus restien el stgir. 24 uras pretenda l’abundonza tut noss’attenziun. Nuot astga muncar, cuntinuadamein dat ei plaschers, deletgs e bialas emoziuns. Ch’il Bambin porti, en quell’atmosfera demistificada, in pigniel en stiva ils 24 da december ei strusch pli ina surpresa. Ni bein?