Nua cumpras ti tes maccaruns?

Il svilup da la Butia Tarasp è per uschedir in evergreen en blers vitgs pli pitschens. La stizun ha da cumbatter per si’existenza ed emprova da chattar ina nischa u in model da fatschenta per surviver. Ussa vul la cooperativa responsabla schlargiar il chantun cun maisas per baiver in café. Custs per refar la butia: var 80 000 francs. – Ina bun’idea? Ed insumma, nua vas ti atgnamain a cumprar tes maccaruns?

Mintgatant vai spert

Midadas tar stizuns datti er a Scuol – e quai gist en in dal megliers lieus dal vitg. Là nua ch’il Coop aveva avant onns sia gronda stizun, vegni a dar in nov stabiliment cun restorant, butias ed abitaziuns. Investur è l’hotelier Kurt Baumgartner ch’ha dà vita ils davos 20 onns a blers edifizis turistics a Scuol. Ses pli nov «coup» da la famiglia d’hotels Belvedere vegn al custar 30 milliuns francs. E questa giada èsi perfin ì glisch cun la permissiun da fabrica – nagins recurs ed la lubientscha era sin maisa suenter otg emnas. Il start per il fabricat è stà venderdi passà.

«Igl è stà ils 4 d’october 1951.»

In’istorgia en connex cun tut in’auter fabricat gigantic raquintan ils schumellins Ursulina Müller-Dora e Marcel Dora (81) – oriunds da Marmorera. Ensemen cun nossa collega Sandra Balzer han els recapitulà anc ina giada quai ch’era capità avant set decennis cun lur patria, cun il vitg inundà e cun lur famiglia. Ursulina Müller-Dora sa regorda anc exact dal di, cura ch’els han bandunà Marmorera: «Igl è stà ils 4 d’october 1951.» – Lur regurdientschas fan impressiun.

Federico tgi?

E lura: enconuschas ti Federico Sturzenegger? – In num da bellezza: Federico Sturzenegger! Insumma, quai è in minister detg impurtant al mument en Argentina, ina persuna cun ragischs svizras. Pertge che Sturzenegger è impurtant per ses pajais, quai tradescha oz il columnist e giurist Christian Fey.