Cur chi’s vain in üna tschert’età …

Üna bunura cuort avant Nadal am duna ün stumpel intern e vegn pro l’oculist. Daspö mais n’haja la saira ün pa fadia da leger ils custabs in meis cudesch. Sco pro la camera da fotografar han meis ögls il prüm da s’adattar a la scrittüra fin ch’ella dvainta plü precisa. E plü dalöntsch davent ch’eu tegn il cudesch e plü clera cha la scrittüra dvainta. Ün tempet esa amo i da tegner simplamaing il cudesch adüna ün toc plü dalöntsch davent. Intant es mia bratscha massa cuorta. Dimena am survendscha dad ir pro l’oculist.

Fin uossa d’eira adüna superbgia da meis buns ögls. Cun grond zeli legia ils custabs süllas tablas cha l’oculist am muossa. Ed eu n’ha bod ün pa baja cur ch’el constatescha: «Üna vezzüda a lunga distanza sco ün’aglia.» Fingià lessa paquettar insembel mia roba pensond cha be mia stanglantüm da la saira sarà respunsabla pels custabs tuorbels in meis cudesch, cur cha l’oculist disch: «Ed uossa faina amo ün test per verer quant bain ch’Ella vezza da dastrusch.» Uiuiui. Pür davo quist test am dvainta consciaint quant mal ch’eu vez intant propa. L’oculist am quieta: «Quai es normal e capita per motiv da l’età.» Alterssichtigkeit. Quel pledun douvra’l. ALTERS­SICHTIGKEIT! – Hallo, eu n’ha pür 42 ons. La spiegaziun da l’oculist cha la marella da l’ögl saja concepida be per var 45 fin 50 ons nu’m calma propa. Anzi, uossa pensa landervia cha amo avant 150 ons füssa fingià rivada a la fin da meis ciclus da vita.

Mo bain, basta, i nu güda nüglia. Eu douvr ögliers per leger. Uschè da quels sco cha la glieud veglia ha. Ün pa chappa vegna pro la collavuratura da l’oculist chi prepara roms d’ögliers per tscherner. Cul prüm öglier para be Harry Potter, cul seguond Gilbert Gress, lura vain a la fin ün model chi nu sgrada dal tuot mia fatscha plütöst stretta. Eu nu sun vairamaing vanitusa a quai chi reguarda mi’apparentscha, mo meis ego es ün pa sbügnà davo la diagnosa «Alterssichtigkeit» ed uschea vaja üna ter pezza fin ch’eu n’ha tschernü quatter exemplars chi «nu füssan uschèèè mals». Ch’eu dovrarà ils ögliers be per leger in meis agen let es irrelevant in quist connex. Sch’eu stögl fingià avair ögliers per leger, lura lessa almain verer oura intellectuala.

Meis teenies tschernan independentamaing ün da tschel il listess model da rom chi’d es eir meis favurit. Els am cuffortan: «Tü guardast oura smart cun ögliers, mamma.» Smart, ok cun quai saja viver. Dimena fetscha la pasch culla nouva situaziun. La prosma crisa gnarà – il plü tard cur chi’d es da tscherner il model pel rollatur.