Lectura rumantscha 17-01-2025
Bun di a la lectura dal di! – Sco adina dain nus da leger er oz blers bustabs. Ma i va questa giada era per cifras:
Las trais cifras da l’express
Ta regordas anc da las trais cifras decisivas dal Solarexpress – quai era stà quel conclus dal 2023 che vuleva ir en l’offensiva cun novs implants fotovoltaics en Svizra. Las trais cifras eran: 60%, 10% e 2025. Per bustabar quai pli exact: Tenor l’ordinaziun federala pon projects fotovoltaics quintar cun subvenziuns da fin 60 % dals custs d’investiziun. Per survegnir quels raps, sto il singul implant dentant producir silmain 10 % da sia producziun planisada fin dal 2025. Damai tut cler? – Gea, però divers projects han gia stuì capitular. Il Solarexpress era memia spert. E co statti pia cun l’implant previs sin il Vorab a Laax? – I vegn stretg er si là!
La Val Müstair resta tar nulla
L’Engiadina ha circa diesch. Er en ed enturn la Surselva datti var diesch. Perfin en Val Bregaglia ha trais. Ma la Val Müstair ha nulla! – Sas ti, da tge che nus discurrin? – Geabain, i va per chamonas dal Club alpin svizzer (CAS). Per era finalmain avair in allogi dal CAS è il Cumün da Val Müstair sa stentà ussa dapi plirs onns per pudair eriger ina tala chamona en la Val Mora – e quai or da la veglia Alp Sprella. Ma il project ha stuì far la runda fin al Tribunal federal a Losanna. E quel ha ussa decis a favur dals recurrents, la Pro Natura e dal WWF. La chamona na dastga pia betg vegnir bajegiada. La Val Müstair resta tar nulla.
Far pops!
24 000 persunas. Quai è ina cifra che Marcus Caduff, il president da la regenza grischuna ha tradì en l’intervista cun la FMR. Precis uschè bleras persunas mancan en 20 onns en il Grischun al martgà da lavur. U cun auters pleds: i van bler dapli persunas en pensiun che per il mument a scola. Tge proponas ti da far cunter questa tendenza? – Nus proponin: far pops! E Marcus Caduff è atgnamain da medem’idea!
Arevair e bun divertiment cun la Lectura rumantscha!
Gust da leger dapli?