Vegns ti insumma da leger quest text?

Bun di a tia lectura dal di! – Oz discutescha tut davart la demissiun da la cussegliera federala Viola Amherd e davart pussaivlas successuras e successurs. (La dumonda da las dumondas grischunas: Ha Candinas mustgas u betg?) Nus laschain star quel carrussel – e giain pli gugent en ustaria, tar la muaglia e tar l’oculist.

Probabel nagin crimi da virola

Ta regordas anc da las scenas ch’igl aveva dà avant 15 onns en il Grischun en connex cun la vaccinaziun encunter la malsogna da la lieunga blaua? Surtut il pur engiadinais Tumasch Planta aveva fatg frunt a l’obligatori da l’anteriur veterinari chantunal Rolf Hanimann. Igl era in duel cun demos e process. Ussa, intgins onns pli tard, sa fa la malsogna da la muaglia anc adina valair. Ed ils purs grischuns ston puspè s’occupar da la virola. Questa giada dentant senza sforzs ed obligatoris.

Has ti gugent «Fleischvögel»?

Quests dis è il famus Laax Open – la concurenza da freestyle e snowboard che attira superstars da la scena en Surselva. In’ustaria che cuschina per tut ils cracks è il «Piazza» a Laax Murschetg. L’ustiera Jasmin Arpagaus ha laschà guardar al redactur Augustin Beeli en las padellas. Ed ella sa regorda ch’ils snowboardists èn stads bravamain schoccads l’emprima giada cura ch’els hajan legì en la carta da menu ch’i dettia «beefbird», apunta ils «Fleischvögel».

Vegns ti insumma da leger quest text?

Has ti era mintgatant fadia da leger singuls texts, sco p.ex. quest textin? Stos ti era stender adina pli ferm la bratscha, per insumma pudair decifrar singuls bustabs. Sche gea, lura na stos ti betg ta far memia gronds quitads, lura sa mussa tar tai simplamain plaunet la «Alterssichtigkeit». Cun auters pleds: I dovra egliers u ina correctura per leger. Nossa columnista Fadrina Hofmann ha era stuì ir tar l’oculist.