Lectura rumantscha 20-01-2025

Bun di a la lectura rumantscha dal glindesdi: Oz vai per chant, per mulscher ed adatg: per ina ruttadira da la chomma.

Trun, Zuoz – ed ussa Vella

L’Eurovision Song Contest rumantsch ha lieu be mintga 3 onns. Il “star” da quel eveniment èn damai betg Nemo u DJ Bobo, mabain Clau Scherrer. Dapi 2019 organisescha el ensemen cun auters idealists l’occurrenza che duai promover la chanzun da chors. Suenter Trun e Zuoz turna la concurrenza puspè en Surselva, en la bella Val Lumnezia. Quella ga duessi vegnir pli “epic”: In sulet mega-chor da 40-45 cantadurs e cantaduras duai chantar la chanzun finalista.

Per mulscher turists (e vatgas)

Onn per onn sa tschentan milliuns e milliuns en las cassas communalas da Laax. Cun quellas pon ins alura finanziar diversas chaussas: lais da fermada, parcs da solar, scola, scaldaments, ustarias ed uschia vinavant. Il pli nov “gadget”: Sin l’alp Nagens vegn construiu ina “mulschera”, vul dir in stan da mulscher. Il redactur Augustin Beeli descriva quest indrez pratic cun ils suandants pleds: “Naven dalla stad 2025 vegn il persunal dall’Alp Nagens a rimnar la damaun e la sera las vaccas ch’ein da mulscher e catschar ellas el stan da mulscher.”

Speras vegn era anc l’ustaria turistica che sa chatta gist sper la mulschera engrondida. Mia proposta da descriver quest’investiziun: “Naven dalla stad 20245 vegn il persunal dall’ustria a rimnar la damaun ils turists e las turistas e mulscher quellas e quels cun horrents prezis per salsizs e plattas caschiel.

Epi vegn Epp

Sch’ins stuess attribuir ina malsogna al sectur da sanadad Surselva, lura fiss quai probablamain ina ruttadira da la chomma dretga. Sche il nov president, René Epp, vegn da cuntschar ensemen questa plaja, n’è anc betg dal tut cler. En mintga cas ha el annunzià che la collavuraziun saja per el insatge dal pli impurtant. Entant ha Ralph Schläpfer, il president communal da Schluein che ha schon insinuà ils ultims mais la suprastanza da l’organisaziun, procurà per in nov eclat: El ha bandunà la radunanza. La FMR po be giavischar: Buna operaziun!