Sinergias sill’Alp Nagens

Il december vargau, a caschun dalla radunonza da preventiv, ha la suprastonza communala da Laax presentau l’investiziun. Igl ei ina simbiosa agricol-turistica ella valeta da 1,4 milliuns francs. La radunonza communala da Laax ha approbau il credit aschia che la vischnaunca vegn a realisar uonn la secunda etappa d’ina restructuraziun per l’Alp Nagens. Vendergis ha ella publicau la damonda da baghegiar dil project cul tetel «Engrondiment intern dall’ustria Stalla e sanaziun dil stavel d’alp». Ils 22 da mars 2024, avon prest in onn, haveva la vischnaunca publicau l’emprema etappa, ina investiziun da 300’000 francs. El decuors dalla stad ha ella baghegiau sur il stavel dall’Alp Navens ina suosta cun mulschera pil menaschi d’alp. Igl implont niev per 80 vaccas corrispunda allas normas modernas dall’alpegiaziun. Il persunal d’alp sto buca pli catschar las vaccas en stalla e rentar ellas, sulettamein per mulscher.

Mulschera ei construida

Quellas cundiziuns erien buca optimalas pils process e la segirtad da lavur, ed era pil beinesser da persunal ed animals, ha la suprastonza communala explicau il december en sia presentaziun dil project. Simona Camathias, collaboratura digl uffeci da baghegiar da Laax, conferma alla FMR ch’ins hagi elaborau il project ensemen cul post da cussegliaziun dil Plantahof a Landquart. Naven dalla stad 2025 vegn il persunal dall’Alp Nagens a rimnar la damaun e la sera las vaccas ch’ein da mulscher e catschar ellas el stan da mulscher. Quei sistem corrispundi meglier alla sanadad dils animals ed hagi consequenzas positivas silla producziun da latg.

La schinumnada mulschera ei construida e sil zercladur vegn il menaschi niev prius en funcziun. Aschia ch’ils stavels dall’Alp Nagens, situaus paucs meters sut la mulschera, ein danvonzs. Buca diltut. La mulschera nova pussibiliteschi ina utilisaziun nova dallas stallas, ha la suprastonza declarau ella presentaziun dil project. Cun transferir la mulschera naven dils baghetg d’alp existents sa la Gruppa Arena Alva medemamein reorganisar siu menaschi. Dapi zacons onns meina ella sill’Alp Nagens l’ustria Stalla. Quei pign menaschi gastronomic ei situaus sin 1962 m s.m., en in liug cun biala vesta ed accessibels per in e scadin. La stad meina schizun in bus da posta cun urari ufficial viers Nagens, gl’unviern ei la Stalla amiez il territori da skis.

Dapli plaz per gastronomia

La stad proxima vul la vischnaunca concepir da niev l’Alp Nagens. Ils purs cargan mintga stad 80 vaccas da latg sin quella. Signun, zezen e dus pasters miran dalla muaglia ed ein responsabels pil menaschi alpester. Quei menaschi producescha bien siat tonnas caschiel e 700 kilos pischada. Sut il medem tetg ei l’ustria Stalla ed ella vischinonza la zona da tendas dil glamping Nagens, il campadi pop-up dil TCS. Il menaschi d’alp ed il menaschi turistic-gastronomic fuorman el futur ina sinergia optimada. D’ina vart eis ei necessari da sanar il tschalèr da caschiel e da corrispunder aschia allas cundiziuns dalla higiena, vitier vegn la substanza da baghegiar dalla tegia renovada. L’ustria Stalla survegn il medem mument dapli plaz per hosps singuls ed occurrenzas per gruppas.

Cull’avertura dil FlemXPress vegn il diember da turists previsiblamein a s’augmentar, perquei eis ei d’engrau d’optimar ils dus menaschis e d’engrondir la surfatscha dall’ustria. La suprastonza communala da Laax trai la suandonta conclusiun dalla mesira: «La reorganisaziun colligia agricultura e gastronomia e rinforza il medem mument l’attractivitad turistica dalla regiun. Quei diever multifuncziunal dall’Alp Nagens rinforza buca mo l’agricultura regiunala, mobein porscha era a visitaders la schanza da far l’experientscha da tradiziun ed innovaziun»., ha ella declarau alla radunonza communala», declara Simona Camathias, la collaboratura digl uffeci da baghegiar alla FMR.