Lectura rumantscha 27-01-2025

Bun di chara lectura, char lectur. Oz datti ina bella salata maschadada da leger cun las ingredienzas giuvna artista grischuna en il Museum d’art a Lucerna, in biolog che cumbatta per in Grischun verd ed ina nova plazza da scola senza autos, ma cun massa uffants.

Nitscholas en il museum d’art

La giuvna artista Davina Andrea Deplazes, oriunda da Surrein, ha gudagnà il premi «Solo» dal Museum d’art a Lucerna. Ella ha uschia survegnì la pussaivladad d’exponer en ina entira stanza dal museum sias ovras. Trais objects gronds ed ina seria da pitschnas plattas-crap ha ella stgaffì aposta per quella stanza. La pli marcanta ovra cun il titel «Scorsas» èn trais nitscholas en aluminium e vaider che pendan giu dal palantschieu. La curatura dal museum, Susanne Gerber, è intgantada da l’artista sursilvana. Davina Andrea Deplazes haja gust dad empruvar ora da cular aluminium, elavurar vaider u stgalprar marmel. «Ella è in’artista fitg curaschusa.»

La natira duai esser schanza e betg problem

Armando Lenz maina dapi tschintg onns l’organisaziun per la protecziun da l’ambient Pro Natura Grischun. Sco biolog e commember da La Verda metta el tut sia energia en la protecziun da la natira e l’ambient. Per el èsi cler: l’energia solara ha in potenzial enorm, ma sin ils tetgs da chasas enstagl en las regiuns alpinas. Sch’i fiss pussaivel, giavischass Armando Lenz in sguard nov sin la natira: «Jau giavisch che tuts vesan la natira sco schanza e betg sco problem.»

Blers uffants e nagins autos sin la plazza da scola

In giuven collectiv d’architectas ed architects da Turitg ha gudagnà la concurrenza per il nov areal da scola a Quadras a Scuol. Il project cun il bel num «Flurina e Mauro» è vegnì preschentà il venderdi passà a la populaziun. Quel prevesa ina plazza da scola senza autos. Nairas uras ch’ils uffants survegnan apunto dapli plaz ordadora, dentant era endadens. Ed ils autos vegnan bandischads en la garascha sutterrana ch’è era planisada en quel project – sper novs edifizis per las scolinas e per il stgalim aut.

A revair e bun appetit tar la lectura dad oz.