Ün proget «incunvenziunal simpel» pella scoula da Scuol

«Important ans d’eira d’amegldrar l’ütilisaziun e l’access da l’areal», declera l’architect Gabriel Merkli. El es part dal collectiv d’architectas ed architects giuvens da Turich chi ha pella prüma jada guadagnà üna concurrenza d’architectura e chi fabricharà a Scuol sia prüma scoula.

Cun lur proget «Flurina e Mauro» vain fabrichà sün l’areal da Quadras ün nouv edifizi pellas scoulinas, ün pel s-chalin ot ed üna garascha suotterrana. «Nus lain dar a mincha s-chalin da scoula ün agen sectur e deliberar l’areal uschè bain sco pussibel dal trafic motorisà», disch l’architect. «L’entrada a la garascha ed ils parcadis per giasts vaina perquai spostà a l’ur da l’areal.»

Il capo Aita Zanetti, chi d’eira eir part da la giuria, disch cha’l proget «Flurina e Mauro» haja accumpli il meglder las pretaisas fattas ed haja gnü ün bun rebomb eir pro las persunas d’instrucziun. «I darà üna plazza da scoula sainza autos e quai es ün grond guadogn», disch ella.

Ün detretschamaint da l’areal

Actualmaing serva la plazza da scoula eir sco plazza da parcar e l’areal vain occupà eir da l’administraziun cumünala intant cha las scoulinas e las structuras dal di sun drizzadas aint ourdvart. Quella situaziun voul il cumün müdar, far ün uschedit detretschamaint. «L’areal Quadras dess in futur esser reservà pella scolaziun», disch Aita Zanetti.

Primarmaing vaja però eir per quai da s-chaffir daplü lö pels uffants e pellas persunas d’instrucziun: Actualmaing sun las stanzas dal s-chalin ot straplainas, pellas persunas d’instrucziun manca il lö per as preparar ed ils uffants ston per part ir i’ls corridors per far lavurs individuals o da gruppas. «Quai nun es üna situaziun chi cuntainta», disch Aita Zanetti. «E tuot tenor svilup demografic vaina eir massa pac lö illas scoulinas.»

Duos edifizis nouvs cun bler lain

Cul proget «Flurina e Mauro» vain fabrichà ün nouv edifizi per trais scoulinas ed üna stanza pella structura dal di al nord da l’areal, là ingio chi’s rechatta intant amo la chasa Central chi dà intant tanter oter tet a l’uffizi da fabrica ed a l’Energia Engiadina. Guardond da là vers süd, da tschella vart da la plazza da scoula e tanter la chasa cumünala e la chasa da scoula existenta, vain fabrichà ün edifizi cun quatter plans pel s-chalin ot. L’entrada a la garascha suotterrana vain fabrichada a l’ur süd-vest da l’areal, suot la chasa cumünala. 

Sco «incunvenziunal simpel» ha l’architect Gian Carlo Bosch descrit il proget «Flurina e Mauro». El ha accumpagnà il cumün dürant il svilup dal concept e d’eira sco expert eir part da la giuria. «Id es ün proget tuottafat professiunal», disch el. «Eu nu vess mai pensà ch’el deriva d’ün collectiv giuven.»

Proceder da valütaziun anonim

Dürant la valütaziun dals differents progets d’eiran quels anonimisats, la giuria es pür davo la premiaziun gnüda a savair chi chi ha dat aint che proget. «Il collectiv respunsabel pel proget ‹Flurina e Mauro› applichescha principis tradiziunals e structuras chi s’han cumprovadas. Quellas hana però interpretà cun simplas masüras in ün möd modern e creativ», descriva Gian Carlo Bosch il proget. «Simpel, ma na banal.»

Ils edifizis nouvs sun dominats da lain. «Uschè bler beton e fier sco chi fa dabsögn, uschè bler lain sco pussibel», descriva l’architect Gabriel Merkli l’idea. Ch’els s’allegran ferm da realisar uossa lur proget insembel cul cumün e ch’els sajan motivats da fabrichar üna bella scoulina ed üna bella scoula pels uffants e pellas persunas d’instrucziun.

Prüm pass d’üna revisiun cumplessiva

Uossa cha’l cumün ha preschantà il proget victur e tschels desch a la populaziun gnia tut per mans la planisaziun concreta, disch Aita Zanetti. «Là esa da verer cha’l proget es cumpatibel cun l’andamaint da scoula e da l’administraziun.» Cha’l böt saja da finir quella planisaziun amo quist on. «Lura pudaina dumandar a la populaziun per ün credit cumplessiv» disch il capo.

La realisaziun dal proget «Flurina e Mauro» es il prüm pass d’üna revisiun cumplessiva da l’areal Quadras e dess cuostar var 20 milliuns francs. In ün seguond pass sto lura eir gnir tutta per mans la renovaziun da la chasa da scoula existenta e da la chasa cumünala. Totalmaing fa il cumün quint cun cuosts da var 35 milliuns francs. «Nus stain realisar pass per pass», disch il capo. Ed agiundscha lura cha our da la perspectiva da la suprastanza cumünala nu’s tratta d’ün proget da centralisaziun pellas fracziuns da Scuol. Cha’l böt principal saja da s-chaffir daplü lö pellas scolaras e pels scolars e pellas magistras e pels magisters a Scuol.