Fluor caschuna malaveglia

La fin da settember 2024 ha Swiss Ski communicau (mira era box): «Naven dalla stagiun da skis 2024/25 eis ei scumandau da nezegiar tschera d’unscher ils skis cun fluor. Quei vala per tuttas serias da concurrenza. Sco basa per quei scamond valan las directivas da concurrenza internaziunalas dalla FIS, ils reglaments dall’Associaziun internaziunala da biatlon IBU sco era il reglament da concurrenza da Swiss Ski. A tuttas concurrenzas en Svizra e sin tuts scalems vegn fatg controllas e decretau sancziuns.» Fluor ei ina substanzia nuscheivla pil carstgaun e pils animals. Enten preparar ils skis a moda caulda sa el vegnir respiraus e sa caschunar malsognas. Restonzas da fluor sin praus ni ell’aua ein da donn pils animals.

Controllas al Surselva Maraton

Part da quellas serias da Swiss Ski ei era il Swiss Loppet ed il Surselva Maraton ei ina d’endisch cuorsas da quel. Il maraton ha giu liug la dumengia. Promt ei vegniu fatg leu controllas pertuccont il diever da tschera cun fluor. Vegni controllai ein ils treis emprems da mintga categoria e sporadicamein era ulteriurs. Tier quater curriders ei vegniu cattau fluor ella tschera. Aschia era tier Janic Camathias da Sagogn. Enviers la FMR ha el detg: «Jeu criticheschel buc igl agir, mobein constateschel che la communicaziun ei buca stada correcta.» El sebasa sin quei ch’era scret silla homepage dil Surselva Maraton. «Leu era communicau ch’ei seigi voluntari da desister da tschera cun fluor. In scamond tuna auter», accentuescha el. Quell’informaziun ei stada da leger silla homepage entochen ier mardis avonmiezdi. Silsuenter eis ella vegnida midada dils organisaturs.  «Voluntari» ei vegniu strihau.

«Quei ei buc en uorden»

Il medem di Janis Spescha da Cuera ch’ei medemamein vegnius disqualificaus pervia da fluor: «Sch’jeu havess saviu ch’ei seigi scumandau d’unscher tschera cun fluor, havess jeu era buca fatg quei. Igl ei semplamein buc en uorden ch’ei vegn communicau ch’ei seigi voluntari da desister da fluor e silsuenter dat ei controllas.» Medemamein critichescha el la mischeida dil Swiss Cup cul Surselva Maraton: «Jeu paghel 50 francs per separticipar alla cuorsa e vegnel disqualificaus. Jeu havess spitgau ina perstgisa dils organisaturs.» Janis Spescha ei staus il tierz spert dalla cuorsa populara dil Surselva Maraton, Janic Camathias havess contonschiu il quart plaz.

Fluor ei d’avantatg

Janic Camathias ei perschuadius che biars auters han era nezegiau fluor la dumengia, senza denton vegnir controllai: «La controlla ei succedia mo tier ina part dallas curridras e dils curriders.» Biars hagien aunc tschera cun fluor e veglien nezegiar quella enstagl da dismetter ella. Da cundiziuns cun temperaturas relativamein aultas sco la dumengia vargada ei fluor in avantatg. «Silla distanza da 25 km sa ei esser senz’auter ch’in currider ei duas minutas pli sperts cun tschera da fluor», di Janic Camathias. Sco autras ed auters curriders dispona era Janis Spescha aunc da bia materia d’unscher cun fluor: «Quei va els tschiens francs. La pli nova tschera senza fluor che vegn per exempel nezegiada el Cup mundial savein nus aunc gnanc cumprar.» Janic Camathias constatescha ch’igl ei stau voluntari da desister da tschera cun fluor al Planoiras in’jamna avon e controllas hagi ei buca dau leu. Sco il Surselva Maraton quenta era il Planoiras pil Swiss Loppet.

Valeivel era pil Swiss Loppet

«La giuria dil Surselva Maraton ei vegnida orientada da quellas controllas. Swiss Ski ha secapescha il dretg da far quellas», di il president dil Surselva Maraton, Guido Friberg alla FMR. Silla remarca dalla FMR ch’ei stetti scret silla homepage dil maraton ch’ei seigi voluntari da desister da fluor di el: «Forsa ei quei buca formulau precis avunda. Quels che separticipeschan allas cuorsas da Swiss Ski duessen denton saver quei. Leutier s’auda secapescha era il Swiss Loppet e consequentamein il Surselva Maraton.» Silla homepage hagi l’organisaziun dau d’entellir ch’ella beneventi sch’ei vegni desistiu da fluor: «Al maraton separticipeschan era curridras e curriders che fan mo quel ni paucas autras cuorsas popularas. Quels van quellas cuorsas per plascher e buca pervia dalla rangaziun. A quels havein nus appellau da desister da tschera d’unscher cun fluor.»

En favur digl ambient

Guido Friberg precisescha era: «Quei mument che nus decretein in scamond da fluor, stuein nus era far controllas. Nus havein denton buca quellas pusseivladads.» In scamond da fluor seigi in accent en favur digl ambient. «Secapescha che buca tuts han giu plascher da quellas controllas. Nus havein denton era giu resuns da curridras e curriders che han beneventau las controllas», di Guido Friberg. La sonda – il di avon il maraton – ein ils skis da tuttas curridras e tuts curriders dil Swiss Cup vegni controllai. Sco Guido Friberg di, haveva negin dils rodund 90 skiunzs fluor sin ses skis.