«Il parlament è in frain»

«I n’è betg da sutstimar», ha Gion-Reto ­Paterlini ditg areguard l’iniziativa communala per abolir il parlament da la vischnanca da Vaz/Obervaz. Per che quella reusseschia, dovri numnadamain 200 suttascripziuns valaivlas e quai tar be radund 1790 persunas cun dretg da votar. Perquai saja l’iniziativa bain in crap da stgarpitsch, uschia il cuniniziant e manader da la ­Paterlini Bau SA: «Probablamain èsi pli grev da reussir cun l’iniziativa che tar la votaziun.» Tuttina quinta el ch’i saja pussaivel da rimnar cun dus, trais gidanters las suttascripziuns necessarias fin il termin ils 23 da fanadur 2025.

Persunalmain daditg in tema

Sco che Gion-Reto Paterlini ha explitgà, è il parlament communal per el gia daditg in tema: «Il parlament è in frain. Ins na vegn simplamain betg vinavant.» I dettia numnadamain a Lai differents projects che spetgan dapi onns sin lur realisaziun: «Per exempel la renovaziun da la plazza da sport, davart la quala nus avain gia votà u ina chasa da parcar amez il vitg.»

Che tut giaja memia plaun, quai mussia dentant surtut in auter project, declera Gion-Reto Paterlini: «Dapi pli u main dudesch onns è in nov center d’attempads e da tgira en planisaziun. E tuttina n’essan nus anc nagliur.» E schegea che betg tut na giaja schlet a Vaz/Obervaz, stoppia el oramai guardar cun in egl scuidus sur ils cunfins: «Il turissem funcziuna, la vischnanca betg. E perquai ans surpassan noss vischins da Lantsch e Churwalden. Igl èn pitschnas vischnancas cun structuras simplas.»

L’onn passà ha dà l’impuls

Ch’il parlament communal è daventà in tema en la vischnanca, quai saja dentant era la consequenza d’ina votaziun da la stad passada, di il cuniniziant: «Ils 30 da zercladur 2024 avain nus votà davart l’introducziun d’ina direcziun communala. Quai avess anc cumplitgà e franà pli fitg l’organisaziun communala.»

Sco ch’ins po leger en il protocol davart quella votaziun, han dentant radund 69 % ditg NA – quai vul dir 489 persunas tar ina participaziun da radund 40 %. Tenor Gion-Reto ­Paterlini ha quest resultat mussà che la populaziun da Vaz/Obervaz na vul betg cumplitgar l’organisaziun communala, anzi: «Igl è stà in cler NA e perquai vulain nus ussa simplifitgar la structura. In parlament communal n’è betg pli adattà.»

Memia baud per prender posiziun

Sin dumonda da la FMR n’ha la vischnanca da Vaz/Obervaz – quai vul dir il president communal Maurin Malär – betg prendì posiziun. Els n’hajan anc betg tractà l’iniziativa. I saja damai memia baud per s’exprimer e pussaivel ch’els spetgian il termin e cunquai il resultat da l’iniziativa.