Mintga uffant cun cancer è in da memia

«Questa fundaziun enconusch jau gia dapi bunamain quindesch onns. L’anteriur president era in bun enconuschent da mai e perquai hai jau era adina puspè prendì part a pliras cursas da sponsurs per la fundaziun e sun uschia adina restà sin il current», raquinta Ivo Caviezel. El è oriundamain da Cuira, stat uss però gia dapi plirs decennis a Turitg. Las relaziuns persunalas l’han manà da surprender la mainagestiun tar la fundaziun (guarda box) da perscrutaziun da cancer tar uffants.

El haja gì cletg, agiunta il giurist, en sia famiglia n’haja dà nagins uffants che han survegnì cancer. «Ma tuttina è mintga singul dals 230 uffants, che survegnian tenor la statistica cancer en Svizra in da memia.» E cunquai che la malsogna cancer sa sviluppa auter tar uffants e giuvenils dovri autras metodas da diagnostica, autras terapias e medischina. E per metter a disposiziun quai dovri la perscrutaziun. E quella vegn sustegnida parzialmain da la fundaziun. Ulteriurs daners survegnian differents projects dal maun public.

Da la giurisprudenza e la medischina

«Nus avain dus oncologs en il cussegl da la fundaziun e quels guardan tras las dumondas dals scienziads e preparan quellas. Uschia pudain er nus betg medis dal cussegl era encleger da tge ch’i sa tracta», declera Ivo Caviezel co che la fundaziun decida tge ninas dumondas che vegnan sustegnidas. Senza il sustegn dals oncologs vess el sco advocat magari difficultads da propi chapir tge exact che vegn perscrutà. ­Actualmain sustegna la fundaziun quatter projects cun radund 450 000 francs. Trais projects da l‘Ospital dad uffants a Turitg ed in a Losanna.

Normalmain duran quests projects var quatter onns. Ils oncologs da la fundaziun surveglian ils progress cun agid da rapports, ch’ils scienziads ston inoltrar. «Sche nus avessan dapli raps, pudessan nus senz’auter era sustegnair in tschintgavel project», declera l’advocat Ivo Caviezel.

Secretari e schef en ina persuna

Procurar per dapli raps respectivamain il uschenumnà fundraising è ina da las incumbensas che tutgan tar la lavur dad Ivo Caviezel sco mainagestiun da la fundaziun. «Cun quai che nus vulain dar vinavant uschia blers daners sco pussaivel a la perscrutaziun, numnadamain dad in franc 84 raps, lavur jau en in pensum da 40 % per la fundaziun e sun secretari e schef en ina», declera il mainagestiun cun in surrir. E l’autra part da la lavur saja l’administraziun, far quints, la contabilitad e scriver chartas dad engraziament als donaturs.

Da vegnir a daners na saja betg adina uschè simpel, declera Ivo Caviezel: «I dat bleras fundaziuns che fan bunas chaussas che la glieud pudess sustegnair.» Ch’els hajan gia empruvà da dumandar per daners cun uschenumnads mailings, ma là saja vegnì enavos magari pauc, dat Ivo Caviezel tiers.

Il meglier èn ils contacts persunals

La fundaziun per la perscrutaziun da cancer tar uffants preferescha perquai ils contacts persunals ch’i dat cun glieud era durant las differentas occurrenzas ch’els organiseschan. Mintg’onn datti in concert cun in chor da giuvens, quest onn da Berna; plinavant datti era regularmain cursas da sponsurs e mintg’onn ina tura speziala da velo. Il mainagestiun mussa lur program ed agiunta: «Uschia pudain nus discurrer cun la glieud ed era ans preschentar al public.»

Ch’el sappia schon, ch’ins pudess far adina anc dapli. E la finamira fiss natiralmain che tschintg da tschintg uffants e giuvenils cun cancer possian vegnir guarids puspè, dat Ivo Caviezel da pensar. «Nus stain londervi ed empruvain pass per pass, per exempel gist actualmain essan nus vi dal discutar tge e co far sin ils chanals da medias socialas, per cuntanscher dapli glieud.» Allegraivel saja en mintga cas il trend, che firmas na fan betg pli regalins als impiegads e clients, mabain ch’i fan cun quels raps donaziuns a fundaziuns, concluda Ivo Caviezel.