150 letgs e 200 parcadis

Dapi biars onns discuor’ins en Lumnezia d’in hotel cun capacitads pli grondas che maunca. Alla radunonza communala da vendergis sera ha la gruppa d’interess informau da sia iniziativa e dils pass ch’ella ha fatg en caussa. Ils plans per ina surbaghegiada dil parcadi dallas pendicularas ein semtgai.

parter

Probablamein eis ei stau la tractanda che ha interessau il pli fetg ils presents. All’emprema radunonza communala dil 2025 ha il president communal Daniel Solèr astgau beneventar 127 votantas e votants. El e ses consuprastonts Martin Sgier, Erwin Capeder, Gian Caduff e Daniel Blumenthal, han era beneventau a quella dus representants dalla cuminonza d’interess «Valurisaziun dalla staziun a val dallas pendicularas a Vella». Orlando Menghini, dil biro da planisaziun Stauffer & Studach e Gian Fanzun, architect, omisdus da Cuera, han presentau co l’idea per in hotel silla parcadi Zignaus a Vella ei sesviluppada ed avanzada.

Il concept ei sin meisa

All’entschatta ha il president communal mess el clar che la vischnaunca ha buca saviu vegnir activa en caussa. Pertuccont l’idea d’in hotel sil parcadi dallas pendicularas a Vella ha ei duvrau l’iniziativa privata. Aschia ha ina gruppa d’interess instradau sin basa privata in process da valurisar gl’areal a Zignaus. Da quella fan part Andreas Hämmerle, Simon Osterwalder, Gian Derungs, Elmar Collenberg, sco era Norbert Cavegn sco representant dil hotel Pellas.

La vischnaunca ha in plaid el capetel en connex culla planisaziun dil territori e midadas da zona. La zona actuala lubescha buca da baghegiar in cumplex da hotel sil parcadi dallas pendicularas. La cumpart gronda dil perimeter cumpigliau posseda la Fundaziun ecclesiastica Caplania. Sia representa, la pleiv Lumnezia miez, ha la gruppa d’interess involvau, medemamein ils ulteriurs proprietaris da terren. Tuts ein stai d’accord da sviluppar in concept per ina surbaghegiada.

Il planisader Orlando Menghini ha descret alla radunonza communala la situaziun dalla planisaziun e tgei pass ch’ein necessaris per realisar in project. La gruppa d’interess ch’ei seformada ha organisau dus workshops, da quels han fatg part gl’expert da hotels Oliver Giger ed ina cumissiun d’experts culs architects Andreas Hagmann e Conradin Clavuot, sco era Johannes Florin dalla Tgira da monuments dil Grischun. Accumpignau il process han era ils representants dalla vischnaunca, il president communal Daniel Solèr e gerau Gian Caduff.

Entuorn 45 milliuns francs

Gl’architect incumbensau Gian Fanzun ha mess el clar che la cuminonza d’interess hagi aunc buca, ella fasa actuala, saviu ir alla tscherca dils investurs. Lur pensum seigi stau da far ina studia da variantas e pusseivladads per ina surbaghegiada. In project pusseivel ei ussa sin meisa e Gian Fanzun ha presentau alla radunonza communala il model e la studia. El ha era explicau il concept e rispundiu damondas. Denter auter ha el confirmau ch’ins discuori d’investiziuns d’entuorn 45 milliuns francs. Il project duei includer in hotel da treis steilas per famiglias cun circa 150 combras. Tenor gl’expert da hotels che ha fatg part dall’evaluaziun eis ei la dimensiun minimala per realisar in tal project.

Per saver finaniziar quel drova ei ina cumpart da habitaziuns secundaras. Ina garascha sutterrana cun 200 parcadis duei remplazzar la surfatscha actuala ch’ei ussa a disposiziun als vehichels. Il president communal ha rendiu attent ch’ins hagi risguardau gl’aspect dils parcadis supplementars el temps da sesiun aulta. Il concept architectonic che la cuminonza d’interess favurisescha secumpona da duas casas principalas cun mintgamai treis alzadas. La fuorma e grondezia dallas casas sedrezzan alla quella dalla casa da vegls e da tgira Da Casa. Ina secunda part dil project includa il slargiament dil hotel Pellas, ei fuss planisau d’engrondir e cumplettar el cun 24 combras novas.

Enteifer diesch onns

Il president communal Daniel Solèr ha puntuau che la cuminonza d’interess ha organisau e pagau sezza tuttas lavurs ch’ella ha schau far. La vischnaunca e la cuminonza d’interess han fixau ina cunvegna pertuccont la planisaziun locala. Sch’il project vegn realisaus enteifer diesch onns vegn la cuminonza d’interes a restituir alla vischnaunca ils cuosts dallas lavurs da planisaziun. La vischnaunca sa vegnir activa pér cu l’investura futura – ch’ei aunc d’anflar – inoltrescha la damonda per ina midada da zona.

Cumprar «la casa dil pec» a Vella
Sper l’orientaziun pertuccont il project da hotel ha la radunonza communala giu da prender divers conclus. Cun gronda maioritad e senza cuntervuschs ha ella approbau, per mauns dalla votaziun all’urna dil settember 2025, in credit da 1’350’000 francs per cumprar ina cumpart dalla parcella 4324 a Vella. La cuminonza d’artavels dalla «casa dil pec» venda alla vischnaunca – culla resalva che la cuminonza all’urna approbeschi il settember 2025 il project – la part veglia dall’immobiglia, cun pasternaria, treis habitaziuns e garaschas. La part nova venda ella a cumpraders indigens. Culla cumpra vul la vischnaunca garantir che la pasternaria dalla cooperiva ViVal sa mantener siu menaschi en quella casa. Avon la votaziun ha il president communal presentau alla radunonza in plan da rentabilitad dall’investiziun.

Via La Ritta e stan da mulscher Alp Sezner
La suprastonza communala ha presentau treis autras damondas da credits. Ina summa brutta dad 1,8 milliuns francs ha il suveran concediu unanimamein per sanar la via d’uaul viers ils cuolms La Ritta sur Tersnaus. Ei setracta d’ina via d’ina lunghezia da 5,7 kilometers, ella ei da gronda impurtonza pigl uaul da schurmetg. Il cantun subvenziunescha l’investiziun cun ina cumpart da 68 %. Ina summa da 880’000 francs investescha la vischnaunca pils stabiliments dall’Alp Sezner, ina dallas quater alps da vaccas ella vallada. El center dil project ei in stan da mulscher directamein ella stalla, quel duei remplazzar la rentada convenziunala. La radunonza ha concediu cun gronda maioritad e senza cuntervuschs il credit.

Vinavon ha la radunonza communala approbau la proposta dalla suprastonza da sanar la Via Resgia a Vattiz. .Per quei intent ha ella lubiu in credit da 295’000 francs.
Era cun gronda maioritad e senza cuntervusch ha la radunonza ina revisiun parziala dil reglament da salarisaziun per la suprastonza communala. Cun vigur retroactiva naven digl 1 da schaner 2025 vegnan ils commembers dall’executiva indemnisai cun 12’000 francs ad onn. Igl ei buca pli in gremi da nov, sco quei che la constituziun camonda, mobein da tschun. Sigl 1 da schaner 2028 sa la vischnaunca reveder la constituziun e fixar ufficialmein il gremi da tschun commembers da suprastonza. Pil temps intermediar ha il Cantun delegau in cumissari ella persuna dad Ueli Caduff.