Il futur dal «Juliertrail» sa decida a l’urna
Proxima dumengia decida il Surses puspè davart il credit d’impegn per il «Juliertrail». Quel aveva la radunanza communala approvà il december 2024. Ma cunquai ch’il referendum cunter quest GEA è reussì, sto la populaziun dal Surses votar a l’urna davart il credit dad 1,45 milliuns francs – e pia danovamain sa dumandar, sche la senda da viandar e mountainbike sur il Güglia è ina buna investiziun.
Atgnamain aveva il project «Juliertrail», la senda da viandar e mountainbike sur il Güglia, gia superà ils obstachels communals. La radunanza dal Cumegn da Surses aveva approvà il december 2024 la revisiun parziala da la planisaziun d’utilisaziun sco er il credit d’impegn da radund 1,45 milliuns francs per quest project. Gia il schaner 2025 è il «Juliertrail» dentant puspè vegnì franà – quai tras il referendum cunter il credit d’impegn. Per decider definitivamain, sche quest project saja ina buna investiziun u betg, è la populaziun dal Surses perquai clamà a l’urna proxima dumengia, ils 18 da matg 2025.
«Far fit la val»
Il «Juliertrail» po en mintga cas quintar cun il sustegn dal Veloclub Surses che ha empruvà in pau da mobilisar la glieud, sco che Irene Kolb ha ditg envers la FMR en il num da la suprastanza dal Veloclub: «Per l’ina avain nus sensibilisà noss commembers, e per l’autra avain nus creà e distribuì ensemen cun Tourismus Val Surses Savognin Bivio e la scola da skis in flyer a favur dal project.»
Il messadi dal flyer è cler: in GEA al «Juliertrail» munta in GEA al svilup da l’infrastructura turistica, al rinforz da la stagiun bassa e la stagiun da stad, a la colliaziun turistica cun l’Engiadina ed als subsidis finanzials dal Chantun. Tut en tut saja quest project pia in’investiziun en l’avegnir, sco che Irene Kolb ha accentuà: «I va per il futur dal Surses. Cun il Juliertrail pudain nus far fit la val.»
Ella manegia dentant era ch’i saja tar votaziuns a l’urna savens pli simpel per ils adversaris da mobilisar la glieud, schegea ch’ella constatescha era: «Ils resuns a la saira d’infurmaziun a Beiva davart il Juliertrail parevan plitost positivs ed a favur dal project.»
«Investir ils daners en quai ch’i dat»
Sco che Tona Netzer, in dals iniziants dal referendum ch’è vegnì suttascrit da 134 persunas, ha ditg envers la FMR, n’hajan els dentant betg empruvà da mobilisar supplementarmain la glieud: «Jau hai scrit ina brev da lecturs en la Pagina da Surmeir da l’emna passada. Ma uschiglio n’hai jau fatg nagut.» Tge che vegn a resultar da la votaziun a l’urna, quai na po dal reminent er el betg prognostitgar: «Quai è grev da dir. I para che la glieud pli giuvna saja plitost a favur e la glieud pli veglia cunter il project.»
Per Tona Netzer esì en mintga cas cler ch’il «Juliertrail» fiss ina schleta investiziun: «I dat gia bleras vias bellas en il Surses. Ina nova e chara na dovri betg. La vischnanca ha plinavant gia investì radund in milliun francs per bajegiar ora la purschida da restauraziun ed alloschi sin il Pass dal Set. Ed ussa vulan ins investir da nov per spustar la ruta dal Set sin il Güglia.»
In NA al referendum fiss per Tona Netzer perquai a medem temp er in GEA: «I fiss meglier dad investir ils daners en quai ch’i dat gia e nua ch’els vegnan duvrads, per exempel en l’ospital che dependa dal sustegn finanzial.» Ch’il «Juliertrail» haja in effect persistent sin il turissem dubita Tona Netzer plinavant: «Cun il Juliertrail na datti betg avunda nova glieud per promover la stagiun bassa. Per in pèr bikers è il project memia char.»
La suprastanza recumonda in GEA
En ses messadi per la votaziun a l’urna davart il credit d’impegn per il «Juliertrail» ha il Cumegn da Surses resumà la situaziun da partenza e las infurmaziuns las pli impurtantas dal project. Il document da sis paginas è disponibels sin la pagina d’internet da la vischnanca (surses.ch).
En quel recumonda la suprastanza communala plinavant dad approvar il credit d’impegn dad 1,45 milliuns francs. Sco ch’ins po leger en il messadi, muntassan ils custs per il Cumegn da Surses dentant be a radund 580 000 francs. Cunquai ch’il «Juliertrail» è da muntada naziunala, pon ins quintar cun in sustegn dal Chantun da 60 % dals custs imputabels.
Custs da mantegniment
En pli chattan ins en il messadi er indicaziuns davart ils custs da mantegniment, schegea ch’i n’è betg inditgada ina summa concreta: «Per il mantegniment regular dal Juliertrail vegn quintà annualmain cun radund diesch fin quindesch dis da lavur per ina persuna.» Tgi che faschess quellas lavurs, quai n’è dentant anc betg sclerì.
Cler è però era che la vischnanca indemnisass lavurs supplementaras che resultan per las cultivaturas ed ils cultivaturs da terren pertutgà dal «Juliertrail» – per exempel per far saiv. Ma sche quai vegn insumma ad esser necessari, quai decida la populaziun dal Surses pia a l’urna ils 18 da matg 2025.
Gust da leger dapli?