«Il Parc Ela è in regal per la regiun»

Da dar in sguard sin ses curs da la vita fa mirveglias: Linda Netzer (48) n’è betg mo mainagestiun ad interim dal Parc Ela, mabain era mamma da dus mattatschs, spezialista da turissem, pura da nursas, pratitganta schamanica, ex-skiunza professiunala, independenta e cunzunt optimista. Cura che Linda Netzer raquinta da sia vita, menziuna ella numnadamain surtut las pussaivladads ch’ella ha gì, ch’ella ha uss e ch’ella vesa en l’avegnir – saja quai en connex cun sasezza u cun la regiun: «Nus avain las schanzas, nus avain tut quai ch’i dovra. Ins sto mo vesair quai.»

Da las chaschuns ch’ins ha ston ins profitar, pudess ins pia resumar la vista da Linda Netzer. Gist uschia èsi numnadamain er ì tar il Parc Ela, nua ch’ella remplazza dapi dacurt Veronika Widmann durant il congedi da maternitad: «Igl è simplamain sa dà. Jau n’hai lura betg ponderà ditg ed acceptà.» Fin la fin da l’onn è ella perquai mainagestiun dal Parc Ela. Co ch’i va silsuenter vinavant, n’è anc betg cler. Ideas na mancan en mintga cas betg. E per il mument vul Linda Netzer tuttina sa concentrar sin la nova lavur.

Il fil cotschen

Schegea, dal tut insatge nov n’è la lavur tar il Parc Ela betg per Linda Netzer: «Igl è stà mes fil cotschen professiunal dals ultims onns – il svilup da la regiun.» Il davos è Linda Netzer numnadamain stada engaschada tar las Pendicularas Lai sco vicedirectura e responsabla per la realisaziun da differents projects e silsuenter tar il Cumegn da Surses sco manadra dal svilup dal lieu. Tar il Parc Ela saja simplamain il context sa midà in pau – e la variaziun: «Il Parc Ela è in regal per la regiun. El è in instrument per furmar l’avegnir e cumpiglia uschè blers temas differents: l’uman, la natira e l’economia.» La finamira na saja numnadamain betg mo da mantegnair la natira, mabain era da sviluppar in’economia persistenta: «E questa lavur multifara ma plascha fitg bain.»

En quest connex patratga Linda Netzer per exempel vi da projects sco «Ela Genusswelten» che cumpiglia tranter auter il svilup d’ina mazlaria regiunala e la promoziun da puma da muntogna regiunala. Ils projects na mancan pia betg, sco quai che Linda Netzer constatescha, ma: «Per persunas externas n’èsi mintgatant betg uschè cler, tge ch’il Parc Ela fa insumma tut. E quella perspectiva externa port jau ussa natiralmain er en il manaschi e poss dar novs impuls, per exempel areguard la preschentaziun dal parc e ses projects vers anora.»

Hippis cun cullas e culaunas

Tar il Parc Ela n’èsi en mintga cas betg da temair che Linda Netzer na s’engaschia betg cun ideas – è ella gea en general ina dunna da perspectivas multifaras. Schegea ch’il turissem ed il svilup dal lieu èn cleramain ses accents professiunals, ha Linda Netzer fatg bler dapli experientschas, ed era da quellas nunusitadas sco praticas e curas schamanicas: «Igl è ina savida vegliurda, la pli veglia metoda da curar. Ma en l’Europa è quella vegnida interrutta, cunzunt durant la persecuziun da strias.»

L’emprim contact cun il schamanissem haja ella pia gì sur sia fisioterapeuta, sco che Linda Netzer ha raquintà: «Jau hai survegnì il contact da Daniela Rupp a Tavau e lura fatg in curs da basa avant 15 onns. L’entschatta è quai bain stà in zichel spezial. Per mai eran tuts in pau sco hippis cun cullas e culaunas. Ma jau hai sentì che quellas praticas han in effect inexplitgabel. E quai è la difficultad tar las metodas schamanicas, numnadamain dad avair confidenza en ellas.» Concret munta quai che Linda Netzer intermediescha cun sia lavur schamanica tranter il mund da l’uman e quel dals spierts: «Sin mes viadis en autras realitads mobilisesch jau forzas e savida per il bain individual u da la cuminanza.»

Ella n’è nagina schamana

Ina schamana n’è Linda Netzer dentant betg: «Schamans na datti en sasez betg tar nus. Quels vegnan per regla convocà da la cuminanza.» E tuttina fa Linda Netzer lavur schamanica, quai sco independenta: «Jau hai fatg quest pass en l’independenza per pudair ma concentrar sin la lavur schamanica, ma era per avair temp per projects privats.» Nua che quai maina, na po ella dentant anc betg dir.

Ideas per l’avegnir na mancan en mintga cas betg – gist sco la lavur. Sper ils engaschaments gia menziunads gida Linda Netzer ch’è creschida si sin in bain puril da vatgas en il Toggenburg era sin la puraria da ses um a Savognin: «Jau charez da far fain la stad e da gidar l’atun tar il part da tschuts, sch’igl è necessari. Quella lavur ma plascha fitg bain, perquai ch’igl è tut insatge auter che la lavur en biro.» Ma quai fiss puspè in auter chapitel e da quels hai blers en la vita da Linda Netzer – ubain cun ses num da matta – Linda Alpiger (guarda box).