Dis da sulai a Ramosch

Sül stabilimaint da la Bacharia Zanetti a Ramosch vegnan prodüttas raduond 274 000 uras kilowatt energia solara. Quai correspuonda a var 90 % da l’energia cha la bacharia douvra svessa. Hoz venderdi e daman vain preschantà l’indriz solar innovativ.

parter

Dal 2019 ha la Bacharia Zanetti fat müdada da Sent a Ramosch. Quella jada han Sabina e Reto Zanetti pudü drivir lur affar in ün nouv stabilimaint illa zona d’industria a Ramosch. L’investiziun quella jada es statta gronda. «Gnanca da pensar landervia, dad investir al listess mumaint eir in indrizs solars», quinta Reto Zanetti. Però il sömmi da manar tuot l’affar cun aigna energia es restà preschaint. «Perquai n’haja adüna darcheu tscherchà il contact cun perits per chattar üna buna soluziun solara per la bacharia moderna a Ramosch». Ed uossa esa uschè inavant: Daspö l’utuon passà sun installats bös-chs da panels solars sün tuot il tet dal nouv stabilimaint suot il Stradun da Ramosch ed eir la fatschada es per part garnida cun panels solars. Sabina e Reto Zanetti nun han però investi svess, els han preferi la varianta da dar a fit, respectivamaing da metter a disposiziun la surfatscha ad üna ditta specialisada.

Soluziun efficazia per Ramosch

Reg.las Schweiz ha nom la firma chi ha installà l’indriz solar sülla Bacharia Zanetti a Ramosch. E sco cha’l possessur da la firma Josef Grüter quinta, s’haja chattà üna soluziun fich efficazia per Ramosch. Nempe d’installar ils panels gualiv sü in ün pendenza da 75 fin 90 grads ed in fuorma d’ün bös-ch (Solartanne). «Uschea pudaina prodüer energia regularmaing dürant tuotta di e sur tuot on», quinta il perit. La producziun d’energia solara in muntogna saja üna gronda sfida ed el es persvas d’avair chattà üna buna soluziun. «Cun quist sistem vaina installà bod il dubel daplü moduls co pro sistems verticals bifazials», declera’l. Sün tuot il stabilimaint da la Bacharia Zanetti a Ramosch sun gnüts installats 363 moduls solars ed ils respunsabels fan quint da prodüer raduond 274 000 kWh energia solara. Sco cha’l bacher Reto Zanetti declera, correspuonda quai plü o main a 90 pertschient da l’energia cha seis affar douvra dürant tuot on. El es cuntaint e superbi da quista soluziun chi amegldrescha evidaintamaing il bilantsch ecologic da seis affar.

Dis dal sulai

Daspö passa 20 ons vegnan organisats in Svizra ils Dis dal sulai per render attent als prodots ed al svilup da l’energia solara. Quist on han quists Dis da sulai lö dals 16 fin als 25 mai. In quist’occasiun driva eir la Bacharia Zanetti las portas e preschainta insembel cun Reg.las Schweiz ed ulteriuras dittas l’innovaziun solara a Ramosch. In venderdi, ils 23 mai, a partir da las 15.00, ed in sonda, ils 24 mai, da las 10.00 fin a las 15.00 as poja visitar la bacharia e l’indriz solar culs bös-chs da panels. Perits stan dürant tuot il temp a disposiziun per declerar ils detagls. Natüralmaing cha la Bacharia Zanetti pissera eir pel bainstar culinaric. Tanteraint daja ün trategnimaint musical.


Daplü infuormaziuns davart ils bös-chs da panels solars as chatta sün www.solartanne.ch.