«Nus vulein far uorden culs labels»
L’organisaziun Surselva Turissem ei vidlunder d’unir sias forzas en connex cun certificats da persistenza. Igl ei ina cundiziun impurtonta ch’il hosp spetga. La FMR ha discurriu en quei connex culla sviluppadra regiunala dalla Surselva, Céline Meury, e cun Adrian Keller, il responsabel pil marketing digital e persistenza da Surselva Turissem.
Adrian Keller, eis ei oz el turissem semplamein ina moda da seschar certificar?
Na, quei eis ei buca. Sch’ins promovess il label dalla persistenza mo pil prestige ni sco campagna da reclama, fuss quei falliu. Surselva Turissem vul promover in svilup persistent sincer e transparent. Nus essan en contact cullas vischnauncas e culs menaschis dalla branscha turistica. Finamira eis ei da far in pass anavon, pertgei la persistenza ei d’enorma impurtonza pil futur. TourCert ei gl’instrument da mesirar la situaziun momentana, el duei intimar da far ponderaziuns en quella direcziun ed era ir quella via.
Céline Meury, e co promoveis Vus, sco sviluppadra regiunala, quella persistenza?
En nossa strategia regiunala da sviluppar la regiun havein nus definiu ils aspects persistenza, ambient e resursas. Igl ei in muossavia che nus havein sviluppau a moda participativa culla populaziun. Dallas discussiuns eis ei resortiu claramein che quels aspects ein essenzials ed indispensabels pil futur. Sefundond sin quella strategia sesprovel jeu da sustener Surselva Turissem nua ch’ei va e nua ch’jeu sai. Jeu organiseschel per exempel campagnas d’informaziun en caussa, jeu fetsch part dil cussegl da persistenza dalla Regiun Surselva ed jeu mirel suls cunfins dalla Surselva ora per survegnir impuls d’autras regiuns en caussa. Da principi sustegn jeu las expertas ed ils experts, miu pensum eis ei da coordinar e da promover la buna cooperaziun.
Adrian Keller, tgei finamira ha Surselva Turissem priu en connex cul label TourCert?
Nus vulein en emprema lingia contonscher la stad 2026 il certificat grond da TourCert. Igl ei in avantatg che nus essan gia certificai cul label «Swisstainable destination», quei label general possedan aunc 50 menaschis singuls en Surselva. Nossa finamira eis ei ussa che silmeins aunc 20 ulteriurs selaian certificar. Cun nies engaschi vulein nus far uorden culla salata da labels ch’ei dat. Nus promovein in program da persistenza unificau.
Céline Meury, sentis Vus en Vossa lavur gl’interess dils menaschis sursilvans da seschar certificar?
Jeu sentel in ferm interess per damondas dalla persistenza. Quei naven dils campadis tochen tier fatschentas pintgas buca turisticas. Adina puspei stos jeu rispunder damondas e cussegliar en fatgs da persistenza, seigi sil livel dil persunal ni dall’ecologia. Jeu sentel quei basegns d’informaziun cunzun tier menaschis che instradeschan process strategics. Lu setschentan damondas dils products adattai. Dapertut constateschan menaschis ch’ils hosps e turists ein fetg sesibilisari per damondas d’ecologia e persistenza e pretendan in secuntener corrispundent. Jeu sentel en scadin cass in basegns da seschar certificar, quei ei cumbinau cun reponderar ils process dil singul menaschi.
(Adrian Keller) Nus havein era seschau inspirar d’autras regiuns. Nus essan buca ils sulets che vulein esser ina destinaziun persistenta. Perquei eis ei impurtont ch’il post da svilup dalla Regiun Surselva ei involvaus.
Il hosps metta ina regiun turistica persistenta en relaziun cun diversitad biologica e cuntradas intactas. Co ei l’agricultura sursilvana involvada els labels da persistenza?
(Adrian Keller) Nossa finamira eis ei da principi da plidentar tuts menaschis, pia era ils purs. Co nus plidentein quella gruppa, ei aunc buca definiu. L’agricultura ei cumpigliada, ei dat denton negin plan co els dueigien vegnir ella barca. Igl ei in process a liunga vesta, nossa finamira ei ch’els vegnan integrai.
(Céline Meury) Differents uffecis cantunals han differentas finamiras. Quellas digl Uffeci d’agricultura sedifferenzieschan da quellas digl Uffeci d’economia e turissem. Ei duess dar finamiras communablas.
Gust da leger dapli?