In batterdegl en Romontschia

Gievgia sera han dus magistrats svizzers visitau Glion. La presidenta dil cussegl naziunal, Maja Riniker, ed il president dil cussegl dils cantuns, Andrea Caroni, han fatg ina viseta sperta en tiara romontscha. Svizra Turissem e GastroSuisse han organisau la sentupada.

parter

«Per lur onn presidial han els priu la finamira da visitar tuttas regiuns linguisticas. Demai ch’els havessen buca giu capacitads d’organisar sezs in program per quater sentupadas, havein nus fatg quei», ha Markus Berger, il schef da communicaziun da Svizra Turissem, raquintau alla FMR. Il fevrer vargau, a caschun dalla sessiun da primavera, han Maja Riniker, la presidenta dil cussegl naziunal, ed Andrea Caroni, il president dil cussegl dils cantuns, entschiet a Bellinzona lur visetas. La sentupada el Tessin seigi stada, sco Markus Berger ha giudicau, fetg biala, la gronda cuort dil Castel Grande sur il marcau seigi stada ideala per l’occurrenza.

Cun Svizra Turissem e GastroSuisse

La cuort dalla Casa Carniec a Glion ei pli modesta e pintga, denton nuotameins ideala. Leu ha la sentupada dils dus suprems politichers svizzers culla populaziun locala entschiet. L’atmosfera dil beinvegni ei stada famigliara, ins ha entupau glieud dalla polizia locala, cantunala e – cun Maja Riniker ed Andrea Caroni – era naziunala. Vitier havevan ina roscha casas da medias tarmess fotografs e schurnalistas. Las duas partenarias che han organisau l’occurrenza, Svizra Turissem e GastroSuisse, han tratg tut ils registers per la viseta cuorta en tiara romontscha.

Duront che Markus Berger raquenta dalla scuntrada a Bellinzona, cuoran fotografs e schurnalists vi e neu, ell’ustria Casa Casutt a Glion ei gronda truscha. Il cuschinier Linus Arpagaus sia assistenta temporara Maja Riniker ein vidlunder da preparar la tscheina. La damaun era la presidenta dil cussegl naziunal aunc vestgida a Berna cul costum dall’Argovia e sepresentada, ensemen cun collegas dil parlament, per ina manifestaziun dallas tradiziuns svizras. Avon che ir allas 11.30 sil tren viers il Grischun e la Surselva ha ella aunc menar ina debatta ella combra gronda pertuccont il program da defensiun dall’armada.

Il giug dallas damondas

Strusch sis uras pli tard eis ella vid cuschinar a Glion – vestgida en blau ed alv e cun scussal. «Nus preparein in buffet per 50 hosps», tradescha la presidenta dil cussegl naziunal. Il december 2024 ha quel elegiu ella sco parsura. La nova schefa dalla combra gronda dil parlament ha giavischau per siu onn presidial ina sentupada cullas culturas da tuttas quater regiuns linguisticas. Siu collega da partida Andrea Caroni, il nievelegiu president dil cussegl dils cantuns, ha giu il medem giavisch. Svizra Turissem e GastroSuisse han surpriu l’organisaziun.

Suenter las 18.00 semtga Maja Riniker ella Casa Casutt in dils tagliors pils hosps. «Ei dat differents tagliors cun da quei e da tschei», tradescha la schefa dil service, Theres Arpagaus. Quei ein in parfait da fein cun randas, in tatar dil salmelin lumnezian, plattas freidas cun salsiz, andutgels, schambun e puolpa. Naturalmein divers caschiels. In dils tagliors ei emplenius cun fortem vadi e pulenta.

Il squetsch avon il service

Pils gastronoms da Glion eis ei ina viseta tut speciala. «Gie, quei eis ei veramein», cloma Linus Arpagaus ord cuschina empau nervus. Maja Riniker surri, ella capescha zacontas «buccadas» romontsch e sto festginar che tuts ils tagliors seigien semtgai. Igl ei il squetsch avon il service, pertgei gleiti arrivan ils hosps.

Aunc ussa ein lezs ella cuort dil Museum Regiunal Surselva e gaudan gl’aperitiv. Leu, ella Casa Carniec, ein era Maja Riniker ed Andrea Caroni stai avon che serender ella Casa Casutt. Suenter l’arrivada cul tren si da Cuera allas 15.35 han il president dad Ilanz/Glion, Marcus Beer e sia antecessura, cussegliera guvernativa Carmelia Maissen, ensemen cul president dalla regenza Marcus Caduff, menau ils dus magistrats da Berna el marcau vegl da Glion. Uolf Candrian, il promotur regiunal dalla Ligia Romontscha, ha purtau als hosps ils salids e dau ina survesta dalla situaziun linguistica ella tiara dallas 150 valladas.

Andrea Caroni ha cantau

Ils dus suprems politichers naziunals han sin quei giu da separticipar ad in giug da damondas. La moderatura Alice Bertogg ha interrogau els semegliont al giug da «Glanz&Gloria», cul pèr prominent che ha da lignar preferientschas persunalas e tgi che fa meglier quei e tschei. Ina damonda ei stada tgi che suni – ella ni el – l’emprema gegia el parlament. Enquala risposta sco ord la pistola ha caschunau risadas.

Suenter gl’intermezzo luc ella cuort dil museum ein ils dus protagonists s’absentai. Maja Riniker han stuiu festginar dad ir en cuschina ed Andrea Caroni agl exercezi da cant cun Clau Scherrer e Rilana Cadruvi. Dar silla batteria seigi sia fermezia, co ei mondi cugl ensemble Cantus Avis sappi el aunc buca, ha il politicher dil cantun Appenzell Dado tradiu avon che bandunar Casa Carniec. Ella sala dalla Casa Casutt ha el giu caschun d’exercitar las producziuns dalla sera. Ferton che Maja Riniker ha gidau da preparar il buffet pils hosps envidai han ins udiu ord la sala la canzun populara sursilvana«Tutta nana tgu». Cu ils dus politichers han dau adia a Glion era la glieud dallas medias dil reminent gia «a tutta», ella ei numnadamein buca stada envidada a tscheina. Aschia che quellas san buca rapportar da quella part dalla sentupada en tiara romontscha.