72 ni 86 milliuns pil spital da Glion
Ils 26 da zercladur 2025 discuteschan las delegadas ed ils delegai dalla corporaziun da vischnauncas SanaSurselva denter auter davart la purschida futura dil Spital regiunal Surselva. En in emprem pass sto la radunonza sedecider per in dils dus models da spital ch’ein vegni presentai avon dus meins d’in biro d’experts en in studi.
«L’intenziun da decider gia il zercladur davart il model da spital ei stada memia sportiva», di René Epp, ch’ei dapi igl unviern vargau president dalla corporaziun da vischnauncas da sanadad dalla Surselva. «Actualmein essan nus vidlunder da far lavurs da sclariment. Las persunas da clav, quei ein surtut ils schefmiedis dil spital da Glion fan ina evaluaziun operativa dils dus models da provediment presentai alla radunonza da delegai extraordinaria dalla SanaSurselva dils 10 d’avrel 2025.»
Plinavon di il president dalla SanaSurselva ch’igl avegnir dil spital seigi in tema che pertucchi aunc auters acturs. René Epp: «Nus stuein far ina consultaziun approfundida avon che prender decisiuns. Ei setracta digl avegnir dil spital a pli liunga vesta.» La finamira dalla SanaSurselva alla proxima radunonza da delegadas e delegai ei ussa da deliberar in plan da termins pil model da spital futur.
Model da spital e baghetg ein duas caussas
Denter ils delegai dalla Sana Surselva ed ellas medias vegn ei discutau schebein la Surselva drova in spital ambulont ni sch’ins vul mantener il spital cun ina purschida staziunara sco entochen dacheu, mo cun schar curdar pliras prestaziuns.
Ina secunda discussiun che stat en in connex indirect culs dus models da spital, ei la damonda, sch’ins duei construir in niev spital ni renovar il spital existent. Il president dalla SanaSurselva di, ch’ei vegni igl emprem decidiu davart il model da spital e pér suenter vegni la damonda co renovar ni construir in spital niev.
Dus models
Alla radunonza da delegai dils 10 d’avrel 2025 ha l’interpresa PricewaterhouseCoopers (PwC) presentau a Glion in studi cun dus scenaris davart il futur dil Spital regiunal Surselva. La conclusiun dil studi da PwC: u ch’il spital da Glion vegn menaus vinavon sco spital staziunar cun ina offerta reducida, ni ch’el sto vegnir transformaus en in center da sanadad ambulont. Omisduas variantas havessan per consequenza ch’i dess ina reducziun dallas prestaziuns da survetsch.
Offerta reducida ni spital ambulont
Cun la varianta dil spital staziunar cun in diember da letgs vegness il spital dad oz mantenius. Quei denton cun claras restricziuns: igl agid staziunar da piglialauncas, la ginecologia e la pediatria per affons sut 6 onns curdassen. Plinavon vegness ei fatg neginas operaziuns pli la notg. Aschia seresultass ina descarga finanziala da ver in milliun francs ad onn pil menaschi.
Il secund model da spital cun in center d’ambulanza muntass ina midada pli radicala. In spital ambulont muntass che tuttas prestaziuns staziunaras, pia cun pusseivladads da star sur notg, curdassen ed ins duvrass era pli pauc persunal. Il deficit structural vegness reducius fetg cun quei model ed ins savess parter dil fatg ch’il spital purtass sesez neu dallas finanzas.
Tenor il president dalla SanaSurselva, René Epp vegni ins cun gronda segirtad a proponer allas delegadas ed als delegai da mantener il spital a Glion sco entochen dacheu, secapescha cun ina offerta reducida.
Mesiras edificialas
Sch’il Spital regiunal Surselva resta a Glion drov’ei mesiras da construcziun. Quei ei era vegniu detg alla radunonza dalla SanaSurselva avon dus meins. Il spital stuess vegnir sanaus ni spazzaus e baghegiaus da niev sper il spital dad oz. In spital niev muntass expensas da 72 milliuns ed ina sanaziun dil spital existent custass 86 milliuns francs.
Gust da leger dapli?