Il tip: Il temp da las tschereschas
La stad ha cumenzà pelvair gia dapi intginas emnas. Igl è il pli bel temp da l’onn. Gist actualmain, enturn son Gion cun il solistizi da stad, cun ils dis lungs e las notgs curtas. Tenor mai passan quels dis bler memia svelt. Enturn il solistizi da stad è er il temp da las tschereschas. Actualmain charmalan ellas. Tgi che è en vischinanza da las frastgas d’in tscherscher, na po betg desister da prender in pugn plain.
Il fritg indigen dultsch e sensual ha gì ils davos onns adina in zic fadia cun malsognas e vermaniglia. Quest onn èn las tschereschas dentant – almain quellas ch’jau hai – bellas, grossas e senza macla. Pertutgand quest fritg As vuless jau dar il tip dad oz: I dat in cudesch rumantsch che ha in titel adequat: «Il temps dellas tschereschas». Prendì puspe ina giada a maun il Tschespet 74. Igl è quel dad Ursicin G. G. Derungs (1935-2024). Ils 5 da schaner avess el cumplenì 90 onns. L’onn 2007 è cumparì il 74avel tom da la collecziun litterara sursilvana. Il frontispizi da la cuverta dal Tschespet mussa in chanaster cun grossas tschereschas cotschnas.
Il cudesch è ina cuntinuaziun da «La petta de spitgias», in cudesch che Ursicin G. G. Derungs aveva edì 1998. L’autur lumnezian è in vair raquintader. Er en «Il temps dellas tschereschas» as lascha el participar a sia vita e sias experientschas sco student a Roma, conventual da la claustra da Mustér ed uman cun blera curascha civila. Dal rest è questa autobiografia, en connex cun la dumonda dal celibat, fitg actuala.
Gust da leger dapli?