Pil divertiment e la savida
55 pusseivladads da divertiment e da recaltgar savida ein uonn sil program da Pro Junior Cadi. 184 affons han nezegiau ni nezegian aunc la purschida per sedivertir ni per far experientschas cun novas activitads. Il program vegn terminaus la fin da quest’jamna.
Pli baul vegnevan ils pli biars affons occupai cun lavur duront il temps dallas vacanzas da stad. Quellas cuzzavan lu era in bien ton pli ditg. Persuenter deva ei paucas vacanzas dil temps dall’entschatta digl onn da scola entochen la fin da quel. Quei ei semidau da rudien. Il cuoz dallas vacanzas ei pli cuorts e duront quei temps sediverteschan e gaudan ils affons il temps da stad. Biars fan quei per exempel culla purschida da Pro Junior.
Buna participaziun
«Questa stad purschin nus en tut 55 pusseivladads da divertiment als affons. 184 nezegian quella purschida ch’ei vegnida lantschada ils 17 da fenadur e che cuoza entochen ils 8 d’uost 2025», di Nicole Degonda dalla Pro Junior dalla regiun Cadi e puntuescha: «Cun quella participaziun al pass da vacanzas essan nus fetg cuntents.» Nezegiar quella purschida san tut ils affons dall’emprema classa primara entochen la secunda classa dil scalem superiur.
Sin viadi cul traffic public
Danovamein han las participontas ed ils participonts saviu acquistar igl abonnament general grischun dil traffic public per in prezi special. Per in prezi da 40 francs san els far diever dil traffic public el cantun Grischun dils 21 da zercladur entochen ils 24 d’uost 2025. «Nossa purschida ei adattada agl urari dil traffic public aschia che ina e scadin sa serender a quella cun tren ni cun auto da posta», di Nicole Degonda da Sedrun che lavura per Pro Junior Cadi dapi treis onns. La purschida da stad pils affons dalla scola populara porscha l’organisaziun per regla mintga dus onns. La davos ga ei quei denton stau il cass avon treis onns. In’interrupziun pli liunga ha ei denton era dau il temps da corona. La purschida da Pro Junior vegn era sustenida uonn da pliras varts. «Senza il sustegn da nos sponsurs savessen nus buca offerir tut quei», di Nicole Degonda.
Tiels samaritans e la selvaschina
La purschida dil pass da vacanzas da quest onn ei ton gronda sco varionta. En cumparegliaziun cul davos pass ei la purschida vegnida adattada levamein. «Entgins paucs luvratoris havein nus stuiu annullar pervia dalla munconza d’interess ni pervia dall’aura. Lu ha ei denton era dau luvratoris cun fetg biaras annunzias, per part tontas che nus havein buca saviu risguardar tuttas», di Nicole Degonda. Fetg bein frequentada ei per exempel stada la purschida da lavar aur, observar la selvaschina ni il cuors digl emprem agid. Per la purschida da sittar cun buis d’aria ha schizun stuiu vegnir formada ina tiarza gruppa pervia dil grond interess.
Emprender zatgei niev
Ella purschida dils pass da vacanzas da quest onn ei vegniu dau la pusseivladad als affons da far aventuras ni era da recaltgar nova savida sco per exempel el cuors tiels samaritans ni quel da bike. «Nus mussein als affons co reglar la spertadad ni co dominar il bike en general. En emprema lingia lein nus ch’ils affons emprendien d’enconuscher il bike», di Selina Candinas da Sevgein ch’ei engaschada dalla Scola da bike Mustér Sedrun. Ella ei stada ina dallas mussadras al cuors da bike a Mustér. Per contonscher quellas finamiras ei in parcours el Catrina Resort staus a disposiziun allas participontas ed als participonts duront in’ura e mesa.
Svegliar igl interess
Cun 29 affons ei il cuors purschius dall’Uniun samaritana Mustér staus frequentaus fetg bein. «La finamira principala da quei cuors ei da mussar als affons tgei interprender en seracass e da prestar igl emprem agid», di la scolasta samaritana e meinacuors Martina Giger. Ils affons hagien mussau grond interess per la purschida. Il cuors seigi en quei senn buca in mied da propaganda per sedecider in mument da vegnir ell’uniun samaritana ch’ei gie – sco biaras autras uniuns – era alla tscherca da commembras e commembers novs. «Per far quei pass ein ils affons memia giuvens. Commembras e commembers novs han ina vegliadetgna da 20 onns ni dapli», di Martina Giger. Tuttina pudess in tal cuors restar en buna memoria ad in ni l’auter affon.
Gust da leger dapli?