Ina fatscha dallas dunnas da Glion
La stizun da secondhand La Trucca a Glion che appartegn all’Uniun da dunnas da Glion festivescha las proximas jamnas siu tschunavel onn d’existenza. Enteifer quei temps ei La Trucca secasada en novas localitads cun dapli plaz e la tscherca da cumprar e purtar resti ei carschida.
Ils davos dis han las dunnas che lavuran ella stizun da secondhand La Trucca a Glion fatg midada da stagiun. Las caultschas cuortas, camischas cun mongias cuortas e t-shirts, ils calzers bass ed il resti da sport da stad ei vegnius dustaus. Tut quels artechels han fatg plaz als mantels d’unviern, giaccas e pullovers, calzers ed aunc biara autra vestgadira da dunnas, umens ed affons. Naven da sonda proxima presenta La Trucca el Städtli da Glion sia collecziun d’unviern.
L’uniun da dunnas decida
La davosa mesjamna avonmiezdi eran quater commembras dall’uniun da dunnas fatschentadas cun drizzar en la stizun cul resti d’unviern. Lucrezia Berther, Bettina Grolimund, Vreni Caduff e Mengia Feuerstein ein engaschadas sco vendidras ensemen cun aunc ulteriuras commembras. «La radunonza generala dall’Uniun da dunnas decida tgei che schabegia cul gudogn annual che La Trucca fa mintg’onn», di Lucrezia Berther ch’ei era presidenta dall’uniun. «Igl onn 2023 havein nus per exempel pagau 3000 francs alla nova biblioteca communala da Glion ed uonn sustenin nus l’uniun MOMO che regala temps ad affons ch’ein el spital.»
Schuber ed entir
Las quater menadras dalla Trucca han detg ch’ellas seigien surstadas dalla qualitad oreifra da bia resti che vegni purtaus en La Trucca. Lucrezia Berther e Bettina Grolimund han mussau in manti orda launa da caschmir. Mo ellas hagien era gia vendiu ina giacca da curom dalla marca Versace. Quei mo per numnar dus da biars tocs resti da fetg buna qualitad. Lucrezia Berther di: «Ei dat mintgaton surpresas che nus survegnin vestgadira da marcas extrordinaras en in stan excellent.» Secapescha ch’ei vegni era surdau mintgaton resti ch’ins sappi buca vender pli, di Vreni Caduff. «Nossa cundiziun ei semplamein ch’ei seigi entir e schuber. Sche quei ei buc il cass, stuein nus deplorablamein dismetter quellas parts.»
Dapli clientella
Mengia Feuerstein che ha luvrau biars onns ella gastronomia ei ida en pensiun dacuort ed ei dapi quater meins era part dil team da La Trucca. «Jeu sun stada fetg surstada dalla qualitad oreifra dil resti che La Trucca survegn e venda.» Las ulteriuras treis dunnas ch’ein stadas activas naven dall’entschatta seregordan aunc bein dils 17 da november 2020 ch’ei staus igl emprem di da vendita da La Trucca. Ora avon stiziun spitgavi in’entira colonna da persunas per vegnir e mirar nossa purschida. «Oz ei nossa stizun da secondhand in liug ch’ins enconuscha a Glion e la clientella ei carschida en quels tschun onns», di Bettina Grolimund.
Ella storta dil Städtli
La Trucca ei domiciliada ella storta dil Städtli a Glion visavi il Museum regiunal Surselva. Ad interim ha la stizun da secondhand saviu prender a tscheins in spazi da stizun pli grond che ha era lubiu da plazzar ina meisa e sutgas per visetas e clientella. Mengia Feuerstein remarca che La Trucca organiseschi mintgamai la mesjamna suentermiezdi ina stiva da café. «Quei cantun vulein nus tener empau libers da crunas da resti», di Bettina Grolimund. «Nus havein gia ussa igl atun differentas occurrenzas cheu en La Trucca.»
Ina fatscha per l’uniun da dunnas
Las quater vendidras e menadras da La Trucca a Glion han ina gronda motivaziun da s’engaschar era ils proxims onns per lur stizun da secondhand. Per Lucrezia Berther eis ei la persistenza dalla purschida da quella stizun e lu era ils resuns positivs dalla populaziun che motiveschien fetg da cuntinuar. Bettina Grolimund di che per ella seigi ei impurtont da dar ina fatscha all’uniun da dunnas. E quei seigi reussiu cun La Trucca. Mengia Feuerstein remarca che sia motivaziun seigi ei da percepir la tenuta positiva che regi en La Trucca. Vreni Caduff di ch’ils contacts culla glieud ed il scopo da reutilisar il resti seigi quei che motiveschi ella.
Gust da leger dapli?