Ei sestiarnan e fan prova

Managers han savens in, artists medemamein, e sportists ambizius en mintga cass. In agen coach! In cussegliader ni ina trenadra cun qualificaziuns che promovan il potenzial existent dalla clientella.

Ch’in coach ei buca nuot, quei han persunas pli da num e da quellas che disponan dalla muneida necessaria lu spert era fatg persenn. E bunamein sur notg ein coachs da tuttas uisas sederasai dapertutanavon. Ei paran da crescher sillas caglias e da far prova sin mintga terren. In «cotschergnem» nua ch’ins mira!

Secapescha ch’ei sto esser in empau scosauda. Sche pusseivel in coach privat. In beinscolau e qualificau, in che s’encorscha immediat dils talents grondius dalla nova clienta, dallas habilitads digl interessent davon el. In che porscha tractament persunal e tgira exclusiva, in coach suenter mesira. Nuot da meins.

Ei dat da quels versai e specialisai, e dasperas matei da quels dalla bialaura. Sminel jeu, cunquei che tut tgi che vul astga senumnar coach. Lur purschida ei enorma. Agid, sustegn ed encuraschament per grond e pign, en situaziuns pli seriusas e meins. Cheu vegn ei fatg amogna sustegn mental e corporal, ed interessai vegnan empalai sin lur via al spindrament. Ei vegn empermess aventuras spirtalas ni spiritualas e suren il parvis sin tiara. Cussegliau co senutrir per restar sauns e viscals en perpeten. Ni fatg calculaziuns stravagadas per saver exact cons tgaubrochels e kilometers ch’ei basegna gi per gi, sch’ins vul vegnir vegls sco paun e latg.

Leontina Lergier-Caviezel è autura e viva en la vischinanza da Berna.

Coachs accumpognan lur clientella online, ni ch’ins s’entaupa en in biro ni schiglioc zanua en in liug adequat. Duront in tempset ni per in temps pli liung. In temps che sa daventar in tempsatsch che cuoza ad in cuzzar.

Ils colluvrers dall’agentura da maridaglias ein medemamein coachs ozilgi. Ils propi moderns secloman matchmakers. Ed empermettan a lur clientella ch’enquera da maridar, ni ch’ei alla tscherca d’ina relaziun romantica, in survetsch aunc pli attractiv ed exclusiv. Cheu sa negin resister, gnanc ils cumadeivels, lamaschis e runapeis. Suenter ver nudau persunalias e pareta, grondezia e peisa, scolaziun e reputaziun, stil da viver e giavischs e preferenzas e … schiglioc da tut il gianter, enqueran ils matchmakers in – match secapescha. Cun agid da lur banca da datas elegian els dus candidats che paran dad ir aprau in cun l’auter e che pudessen far frina ensemen. Anflan els denter las datas existentas nuot che cuntenta, van els sezs alla tscherca d’ulteriurs clients per saver engrondir l’elecziun. Els visetan occurrenzas elitaras per plidentar e recrutar leu glieud che corrispunda a lur purschida. La clienta, il client sa daferton far pacific. Spitgond sin l’emprema schelta dil matchmaker. 

E tgi che sehona halt nuot d’engaschar in coach ch’encurascha e motivescha traso, che porscha cussegl tut a dubel, lez ei sez la cuolpa. Sto sez mirar co vegnir a cantun cun la situaziun.