Dus novs en suprastanza
Il Surses survegn dus novs suprastants: Thomas Metzler e Michael Klein. Il 1. da schaner 2026 entran ils novelegids en uffizi e remplazzan alura ils titulars actuals Romeo Poltera ed Irene Kolb. Lezza ha manchentà la reelecziun per mo 20 vuschs. E quai è bain er ina pitschna surpraisa, sco che las reacziuns dals trais candidats mussan.
Il suveran dal Surses ha elegì dumengia vargada dus novs commembers da la suprastanza communala, numnadamain Thomas Metzler da Savognin e Michael Klein da Tinizong. Els han survegnì 427 e respectivamain 410 vuschs tar ina maioritad absoluta da 307 vuschs. Ils novelegids entran en uffizi il 1. da schaner 2026 e furman alura ensemen cun Daniel Wasescha (president), Adrian Ballat e Gregor Vellacher la suprastanza communala.
Quai munta ch’i dat gist duas midadas. Dals titulars actuals n’ha Romeo Poltera betg candidà ed Irene Kolb ha manchentà la reelecziun per mo 20 vuschs. Cun 390 avess dentant er ella cuntanschì cleramain la maioritad absoluta. Igl è pia chapaivel che la suprastanta actuala è trumpada: «Jau avess fitg gugent cuntinuà cun la lavur en suprastanza. Ma jau poss er acceptar che la populaziun ha elegì dus novs. Jau als gratulesch cordialmain e giavisch bun success.»
«Senza grondas aspectativas»
Quels n’avevan entant strusch quintà ch’Irene Kolb na vegnia betg reelegida. «Jau hai candidà senza grondas aspectativas. Ma i fa sa chapescha grond plaschair d’esser elegì», ha Michael Klein ditg envers la FMR. L’inschigner d’informatica sa legria entant gia sin la lavur en suprastanza. Tge departament ch’el surpiglia, quai vegnia decidì il schaner 2026 tar ina sesida constitutiva da la nova suprastanza.
Sumegliantamain s’exprima era ses collega futur Thomas Metzler: «Jau ma legrel zunt fitg sin il schaner e da savair cumenzar cun la lavur en suprastanza.» Il candidat cun il meglier resultat n’haja betg fatg propaganda pli gronda, mo da bucca a bucca. El saja numnadamain gia enconuschent a la glieud: «Igl è gea mia secunda candidatura ed jau sun savens d’entupar a Savognin, cura ch’jau vom a spass cun mes chaun.» Ma er el saja in pau surstà dal resultat e stettia mal per Irene Kolb: «Jau n’hai betg spetgà ch’ella manchentia la reelecziun.»
Ins sa mo specular davart il resultat
In’explicaziun per sia terrada n’ha entant er Irene Kolb betg: «Jau poss mo specular. Forsa hai jau pers l’ina u l’autra vusch, cunquai ch’jau m’engasch gia dapi quatter onns en suprastanza. Ed en in tal uffizi n’èsi simplamain betg pussibel da cuntentar finadin.» Malgrà la reelecziun manchentada ha Irene Kolb tuttina in motiv da sa legrar: «Jau hai survegnì blers messadis da glieud che n’ha era betg spetgà quest resultat. Da vesair quest sustegn m’ha fatg grond plaschair ed ha levgià in pau la trumpada.»
Gust da leger dapli?