Il cameleon

La primavera vegni mess. Tgi che fa quei endretg mira gl’emprem el calender: glina pleina, glina nova, glina digren, glina carschen, glina culs pézs engiu. Bien. Mender ei quella culs pézs ensi e buca meins impurtont: Ei basegna d’ina bun’enzenna. Tgei cletg ch’jeu sundel naschida en quella dil capricorn.

Lu entscheiva ei a crescher. Ni eba era buc. Las empremas jamnas stat ins avon in’era plein rauba verda e tratga: Aha. Tgei ei tgei? Truffel ni zerclem? Mintgaton train ins perschuadentamein vid il «zerclem» – per lu realisar ch’ins ha gest dismess l’atgna raccolta. Gratulaziun. Vegn bien. 

Stad: Las tomatas semuossan loschamein en lur vestgius cotschens ed ils zuchettis sedeportan sco buobs pubertars – cuninaga gronds e negin sa daco. Mo ils truffels restan incognito. Negin spitachel, negina show. Els restan quiets. Sco quels emploiai cuort avon la pensiun. Lavuran els? Grev da dir.

Atun: La gronda scuvretga. Tuttenina sesentan ins sco Indiana Jones cun stivlas da gummi. Mintga cavada in’aventura. Magari gronds sc’in pugn. Autras gadas aschi pigns che schizun las miurs han refusau els. Igl ei empau sco da Nadal: Ins giavischa il velo, mo survegn il pullover.

E la finala resta ina damonda da rispunder: Tgei far gl’unviern? Il truffel ei il cameleon dalla cuschina. Gratin, gnocchis, rösti, pommes frites – el sa tut. Aschia capeta ei ch’ins cava igl atun, surmaglia igl unviern e sil pli tard il schaner sedecidan ins da puspei empruar igl onn vegnent. Buca pervia dalla scienzia dalla glina, buca pervia dalla surpresa dalla raccolta. Mo bein pervia digl emprem gratin che di ad ins: Fatg tut endretg.

Patricia Tschuor-Marques viva a Rueun ed ha il pli gugent sche la glina n’ha betg ils pizs ensi.