Lectura Rumantscha

Tge fa bain a tai, cura ch’i fa puspè pli fraid? Èsi ina chanzun chantada dad in chor viril? In musical «made in Danis-Tavanasa»? Ni tiras ti simplamain en in chaud pullover da launa?

Cun ina bella frisura da Nicola

«Zac!» – ina nova frisura, in nov sentiment da vita! Tgisà, uschia èn forsa las nursas da Savognin sa sentidas «tar il coiffeur» questa fin d’emna. A la «Tundeida» a Savognin èn ellas stadas ils stars, che han attirà tut l’attenziun dals radund 2500 visitaders e visitadras. Il tundader-coiffeur Nicola da Mesocco ha lavurà cun ina calma admirabla, ed en circa diesch minutas era mintga nursa deliberada da sia launa chauda.

Drama pur a Danis-Tavanasa

Per ils Engles è il «stonehenge» in lieu magic e cun blera forza, per ils Peruans èsi il «macchu picchu». E per ils da Danis-Tavanasa? Exact, il Plaun Salter! Sin quest prà mistic datiers da Danis ha il musicist Armin Caduff (foto) chattà l’inspiraziun per ses nov musical, che ha festivà sia premiera la sonda vargada. En l’istorgia dal toc vuless in politicher local vender il Plaun Salter ed il prer laschar bajegiar ina nova baselgia cun quests daners, mo la resistenza en il vitg cunter quest’intenziun è gronda.

La chanzun rumantscha a Vella

Cumponer, diriger, chantar e premiar – quai è stà il Festival da la Chanzun Rumantscha 2025. Suenter l’ediziun d’avant trais onns a Zuoz è la scena dal chant rumantsch sa messa sin via en Val Lumnezia. E durant trais dis han chantaduras e chantadurs rumantschs «mess sut­su» Vella, en il bun senn. Ni sco ch’il capo-organisatur e dirigent Clau Scherrer ha ditg envers la redacziun: «Igl ei stau in’atmosfera che ha bunamein fatg alzar il tetg dalla halla a Vella.»

Buna lectura e lascha il tetg sin chasa – igl è in pau fraid.