Lectrua Rumantscha
Tge has ti fatg ils davos 100 dis? «Ina massa, ma pauc endretg», schess jau – e tge fiss tia resposta?
100 dis sco presidenta
Tge che Rita Schmid ha fatg ils ultims 100 dis è cler. Ella ha cumenzà ses nov uffizi sco presidenta da la vischnanca Val S. Pieder. La vischnanca gualsra stat finanzialmain bain, sco ch’ina egliada en il quint communal tradescha: In gudogn da 6,5 milliuns francs ha ella fatg l’onn passà, era grazia a las ovras idraulicas ch’emplainan la cassa communala. La nova presidenta resta dentant mudesta e di en l’intervista: «Val S.Pieder senoda buc els raps.» Igl è damai vinavant da far bogn en l’aua da la terma da Val – e buca sco Dagobert Duck en ils daners da ses tresor.
Pauc peda per far musica
Era pauca peda da far bogn ha Matia Demarmels gì ils ultims 100 dis. Sco schef da la communicaziun da la Partida liberaldemocratica (PLD) è el trasora vi da ponderar, co ch’igl è da vender il meglier las posiziuns da sia partida. Uschia è el era savens d’entupar en la «Wandelhalle» a Berna, nua che ils politichers e las politicras fravegian allianzas. Quai dettia bler da far, e la peda da sa deditgar a la musica Salouf vegnia in pau a la curta.
Il project avanza
Ils ultims 100 dis ha in nov project da la vischnanca da Bravuogn survegnì schlantsch. La chasa da scola dal vitg vegn transformada, che era ina pratica da medis ha plazza en quella. La dumengia passada è stà il di da las portas avertas, nua che abitantas ed abitants han pudì prender invista e s’infurmar davart l’andament dal project. La purschida duai segirar il provediment da sanadad da la regiun.
A revair e bels proxims 100 dis.
Gust da leger dapli?