Pledader en il center da pussanza da la PLD
In um da Salouf tira ils fils tar la PLD – almain areguard la communicaziun. Matia Demarmels è schef da communicaziun en la centrala da la partida a Berna. El cusseglia parlamentaris co discurrer cun las medias e respunda a dumondas da schurnalistas e schurnalists.
Sco profi da communicaziun enconuscha el ils rampigns co vender insatge. Matia Demarmels na venda però betg jogurts, jaguars u immobiglias. Anzi, el venda la posiziun d’ina partida. El procura che sia partida cumparia en la meglra glisch.
Dapi l’entschatta da quest onn è il Surmiran schef da communicaziun da la PLD svizra. Ensemen cun ina pitschna squadra respunda el a dumondas da schurnalistas, cusseglia parlamentaris federals co dar pled e fatg, scriva communiqués u coordinescha termins d’intervista.
FMR: Tge instrument sunais Vus en la musica instrumentala da Salouf, Mon e Stierva?
Matia Demarmels: Jau sun gia dapi 16 onns la battaria e la percussiun. Quai fatsch jau cun fitg grond plaschair.
Tar la PLD na sunais Vus betg la battaria, ma dais en il tact sco dirigent quai che reguarda la communicaziun. Fan ils politichers e las parlamentaras da la PLD obedientscha e sunan els sco che Vus dirigis?
Jau schess plitost ch’il presidi da la PLD dirigia e dat en la direcziun. Ed jau, ensemen cun mia stupenta equipa d’in mez tozzel persunas, nus empruvain da dar in crescendo e da procurar ch’i dettia in bel concert en la publicitad. Nus vulain posiziunar bain las ideas da nossa partida.
Il concert n’è pertutgant ils contracts da la Svizra cun l’Uniun europeica (UE) betg gist armonic. È la PLD tar quel tema en la breduglia?
Or dal puntg da vista liberal n’èn ils novs contracts cun l’UE betg nairs u alvs. Sco Svizra vulain nus exportar noss products senza obstachels. A medem mument datti tscherts quitads pertutgant la birocrazia da Brüssel. Insatge dal pli impurtant ma para quai che cusseglier dals chantuns Stefan Engler ha scrit dacurt en ina columna: Ins sto discurrer dals fatgs, dals avantatgs e dals dischavantatgs. La populaziun duess avair la pussaivladad da far in’atgna opiniun.
Na vegn quai pia betg fatg?
Mia impressiun è che quels ch’èn persuenter e quels ch’èn encunter stravagheschian per il mument. Gist perquai sun jau led che la PLD ha definì in process cler e democratic. Ils 18 d’october discuteschan e decidan ils delegads e las delegadas da la partida davart la parola per la consultaziun tar ils novs contracts bilaterals.
Sche la PLD schess NA als contracts bilaterals, fiss quai però in dilemma per Voss cusseglier federal Ignazio Cassis.
Ignazio Cassis ha manà fitg bain las tractativas a Brüssel ed è turnà cun in resultat ch’è bler meglier che la proposta d’avant. El represchenta l’entir Cussegl federal che ha gia tractà ils novs contracts ed è persvas dal resultat. Ma nossa partida n’è betg il Cussegl federal. Nus stain a l’entschatta da la via per furmar noss’opiniun. E per la PLD èsi impurtant che nus fetschian quai a moda transparenta e democratica. En autras partidas, nua che las opiniuns èn medemamain divididas, decida simplamain la suprastanza.
In auter tema: Karin Keller-Sutter – ch’è ditg stada la ferma figura da la PLD en la regenza – n’ha betg pudì impedir dazis da 39 % dals Stadis Unids per la Svizra. Quant fitg tribulescha quai Vossa partida?
Karin Keller-Sutter è ina fitg ferma pitga en il Cussegl federal. Ils dazis absurds da Donald Trump èn surtut in problem per dieschmillis da plazzas ch’èn tenor prognosas actualmain en privel. Jau na crai betg ch’insatgi en Svizra dettia la culpa a Karin Keller-Sutter u a Guy Parmelin. Trump è Trump.
Las medias han scrit che Karin Keller-Sutter saja stada memia resoluta en il telefonat la fin da fanadur cun Donald Trump. Co è quai stà lez mument per Vus sco pledader da la PLD?
Ils departaments han sa chapescha atgnas equipas da communicaziun. Sco partida essan nus en contact cun noss cussegliers federals e lur persunal. Ils 31 da fanadur ha mes schef Thierry Burkart telefonà vers las diesch la saira e ditg che nus stoppian ans preparar.
E tge avais Vus preparà quella notg?
Nus avain discutà ils scenaris pussaivels cun ils dazis, tge ch’igl è da far per proteger tantas plazzas sco pussaivel e co che la partida duess communitgar. Lura ha jau semtgà ina communicaziun e consultà la suprastanza. En tals muments èsi simplamain da far e dar gas…
Quella notg n’avais Vus pia betg durmì?
Bain, intginas uras schon. Ma la damaun marvegl è la communicaziun ida ora. Suandadas èn passa 20 dumondas da medias al president ed a la partida.
L’onn passà han votants e votantas decidì cun ina clera maioritad la 13avla renta d’AVS. I dat propostas co finanziar quai. La PLD fraina. Pertge?
Il pievel ha decidì la 13avla renta e quella vegn pajada a partir dal 2026. Ma il suveran n’ha betg ditg ch’i duaja vegnir tratg giu mintga mais anc dapli daners da la paja ubain che las cumpras emnilas dad ina famiglia duajan daventar pli charas pervi d’ina pli auta taglia sin plivalur. Nus dal PLD faschain politica per tuttas e tuts che mettan il svegliarin, per la glieud che leva mintga damaun, va a lavurar, fa ses job, guarda dals uffants u s’engascha tar ils pumpiers. I na va betg vinavant uschia – sco ch’ils verds, sanesters e deplorablamain er il Center pretendan – che quella glieud stoppia pajar adina dapli.
I dat persunas che levan mintga damaun e van a lavurar e che han, cur ch’ellas van en pensiun, be la renta d’AVS. Tge proposta concreta fa la PLD per finanziar la 13avla renta?
Nus proponin ina finanziaziun maschadada. Sco emprim duess la 13avla renta vegnir pajada cun la finanziaziun d’AVS sco fin ussa. Sch’ins vesa che las reservas da l’AVS crodan sut in tschert nivel, lura duai vegnir lavurà sis mais pli ditg ed auzà la taglia sin plivalur.
La PLD vul pia auzar la vegliadetgna da renta per in mez onn ed augmentar la taglia sin plivalur, uschia che tuts gidan a finanziar la 13avla?
Gea, quest mix chattain nus fair – era visavi ils giuvens.
L’october elegia la PLD in nov presidi. Nominads è in co-presidi da Benjamin Mühlemann e da Susanne Vincenz-Stauffacher. Pertge datti per tals posts uschè paucs interessents?
Il presidi è strentg. Jau ves quai tar Thierry Burkart. Igl è in job da 24 uras durant 7 dis. Mintga dumengia èn ins sin via ed il telefon scalina. Ins vegn fitg enconuschent, ma è trasora exponì. Gist insatgi che ha famiglia, sa dumonda: Less jau propi quai? Jau sun led che nus avain uss ina uschè coola nominaziun che persvada fitg.
Imitais Vus ils sanesters che han gia in co-presidi?
Insatge poss jau empermetter: Quai che pertutga nossa politica, na vegnin nus ad imitar gnanc in millimeter ils sanesters. Nus faschain exact il cuntrari da la PS. La PLD è la partida che s’engascha per la glieud che leva la damaun e va a lavurar. Quai era la PS era pli baud. Oz lessan els dentant che il stadi paja tut a tuts e ch’el s’occupia da mintga detagl da la vita. Il quint da questa politica survegnan lura mintgamai quellas e quels che van a lavurar. Ma la structura da co-presidi en la PS cun Mattea Meyer e Céderic Wermuth avain nus ussa lura era. Ina dunna ed in um, quai porscha bleras schanzas.
L’entschatta da quest onn essas Vus daventà cun 29 onns pledader da la PLD – il pli giuven schef da communicaziun da tuttas partidas. Daco uschè baud?
L’emprim mument sun jau stà surstà dad obtegnair questa chaschun, ma era losch ed engraziaivel. Jau ma chapesch fitg bain cun Thierry Burkart. Nus avain las medemas vistas. Era il secretari general Jonas Projer na guarda betg sin la vegliadetgna, mabain sin l’output, sin quai ch’ins fa. Oz sun jau led d’avair ditg gea a quest post. Jau fatsch la lavur cun bler plaschair.
E cura avais Vus gì l’ultima fin d’emna libra senza e-mails e telefons?
Il december 2024.
E cura essas Vus stà l’ultima giada ad in exercizi da musica a Salouf?
Il settember han cumenzà las emprovas. Jau sun stà da la partida en l’emprima emprova. Ma jau stoss conceder, ch’jau na poss mai ir l’october. Mes propiest per il 2026 è: Jau less esser dapli en il Grischun, jau vi prender part a las emprovas da musica, guardar ils matchs da ballape dal CBS ed ir pli savens en l’ustaria Alpina cun mes collegas ed il settember cun ils chatschaders.
Schef da communicaziun
Matia Demarmels (30) ha gia da pitschen ensi emprendì da tschappar en – per exempel en il manaschi da transport da ses geniturs a Salouf. Ils studis da relaziuns internaziunalas, dretg ed administraziun publica ha el absolvì a Berna e Genevra. Suenter il studi ha el lavurà in temp sco redactur da la FMR. Dapi il 2022 è el tar la PLD svizra a Berna en plazza – dapi l’entschatta da quest onn sco schef da communicaziun.
Gust da leger dapli?