Bia teater sut tschiel aviert

L’Uniun da teater Sagogn sa mirar anavos sin ordvart fritgeivels 20 onns dapi sia fundaziun igl onn 2005. Buca meins che 14 producziuns ha la squadra da teater da Sagogn presentau el decuors da dus decennis. E l’uniun ha era preparau per igl october 2025 ina ulteriura producziun. Ina che vegn denton presentada al publicum pér l’entschatta dalla stad 2026 e quei buc en halla polivalenta, mobein sut tschiel aviert. Ton per il script sco per la reschia dil toc che senumna «In asen per Tello» ei Manfred Veraguth responsabels. El gi che l’idea da presentar il toc sut tschiel aviert seigi vegnida dallas giugaduras e dils giugadurs. «Duront  las provas per la presentaziun previda pigl october 2025 ei la squadra tuttenina stada dil meini ch’il toc fuss adattaus per dar el liber.» Aschia che l’Uniun da teater da Sagogn ei sedecidida da spustar la producziun ed il termin dalla premiera. «In asen per Tello» vegn giugaus el Curtgin Aspermont a Sagogn l’emprema ga ils treis da zercladur 2026.

Revolta ella Cadi

Preparativas per in giug el liber datti denton er a Mustér.  Leu ei seconstruida l’Uniun Dentervals igl onn 2018 aposta per realisar in teater el liber. Il 2019 ha l’uniun presentau «La stria da Dentervals» ed il success da quella presentaziun ha animau l’uniun da far in ulteriura presentaziun sut tschiel aviert. Il toc «1799 – Revolta ella Cadi» vegn presentaus agl ur dalla baslegia claustrala. La culissa per la revolta ella Cadi savess secapescha buc esser pli adattada demai che la claustra ei stada ina prominenta unfrenda dalla revolta d’avon passa 220 onns. Gion Hosang presidiescha l’Uniun Dentervals che funcziuna gest sco comite d’organisaziun dil proxim giug el liber a Mustér ch’envida alla premiera ils siat d’uost 2026. Gion Hosang gi che las preparativas seigien s’avanzadas e las rollas surdadas. «Pil mument essan nus fatschentai cun la finanziaziun digl entir project.» Tenor las explicaziuns dil president dalla Uniun Dentervals ei previu da presentar la «revolta ella Cadi» dalla vart encunter damaun dalla claustra. «En quei liug vulein nus ereger ina tribuna per biebein 400 aspectaturs.»

Empau pli mudest

A Sagogn perencunter vegn luvrau proxima stad cun pli mudestas dimensiuns. Manfred Veraguth manegia che l’Uniun da teater da Sagogn vegni a saver porscher suttetg a 50 entochen 60 aspectaturas ed aspectaturs el Curtgin Aspermont. «Demai che las provas ein gia s’avanzadas savein nus seconcentrar sin tut tschei ch’ei drova per realisar in toc el liber.» Il reschissur fa attent che l’Uniun da teater da Sagogn dumbri actualmein 25 commembras e commembers. «Quei ei buca bia per realisar in toc el liber ed ei drova igl engaschi cumplein dad in e scadin.» Il toc che Manfred Veraguth ha scret sereferescha agl uestg da Cuera Tello. Ina figura historica enconuschenta en Surselva pervia da siu testament che deriva digl otgavel tschentaner e che menziuna per l’emprem ga biars vitgs sursilvans. Manfred Veraguth ei bein historicher, el drova denton la figura historica per scaffir ina cumedia fictiva che tracta schabetgs ed usits dil vitg da Sagogn. Igl uestg Tello vul far flucs cun ils usits pagauns dils da Sagogn ed el drova perquei in asen.

Historia presenta

Ina historia fictiva ha era igl autur da «1799 – Revolta ella Cadi», Hubert Giger scret. Ina che sebasa sin fatgs historics ch’ein aunc adina dètg presents en Surselva. La revolta encunter l’occupaziun franzosa ha caschunau dabia unfrendas ella populaziun sursilvana. Il vitg da Mustér inclus la claustra ein stai en tschendra. Bia dramatica per in toc dramatic. René Schnoz vegn ad inscenar il giug el liber a Mustér e siu frar Andi Schnoz ei responsabels per la musica. Claudio Simonet ed Armin Caduff cumponan las canzuns ch’in chor ad hoc presenta silla tribuna da Mustér la stad proxima. Ton Manfred Veraguth sco Hubert Giger han experienza cun scriver tocs da teater. Manfred Veraguth ha scret ed inscenau ina gronda part dils tocs dalla Uniun da teater Sagogn e Hubert Giger ha gia mess sin pupi la historia dalla «Stria da Dentervals».