In onn da success

In’egliada silla pagina 11 dil rapport annual dallas Pendicularas Mustér SA muossa che l’interpresa ha fatg ina sperdita igl onn 2024/25. Quell’importa rodund 250 000 francs. Igl onn avon havevan las pendicularas nudau in deficit da 716 000 francs. Mirau ord quell’optica selai il quen veser.

Augmentau la sviulta

Las Pendicularas Mustér SA han fatg igl onn vargau ina sviulta da 16,2 milliuns francs, pressapauc in milliun dapli ch’igl onn precedent. Las entradas dil menaschi da traffic ein carschidas da 4,6 sin tschun milliuns francs e quellas dalla hotellaria e la gastronomia da nov sin 9,7 milliuns francs. S’augmentai ein denton era ils cuosts da persunal per rodund 300 000 francs sin 7,3 milliuns francs. Venderdis, ils 10 d’october 2025 dattan il cussegl d’administraziun e la direcziun plaid e fatg davart igl onn da fatschenta vargau. La radunonza generala dils acziunaris ha liug el restaurant da muntogna a Caischavedra. Cun occasiun da quella duein ils tschun commembers dil cussegl d’administraziun – Marcus Weber, Vincent Augustin, René Epp, Martin Kreiliger ed Ueli Sutter – vegni reeligi.

Cundiziuns optimalas

Sco il president dil cussegl d’administraziun dallas Pendicularas Mustér SA, Marcus Weber, scriva el rapport annual 2024/25, ei igl unviern passau staus in dils megliers ella historia dall’interpresa. Aura e cundiziuns da neiv seigien stadas optimalas. Per quei motiv seigi igl onn da fatschenta vargau staus in success. «Catrina e Mustér ein daventai pli enconuschents», puntuescha Marcus Weber. La nova scursalera seigi daventa spert ina calamita ed il niev restaurant Parvis seigi reussius cumpleinamein. La stagiun da stad ei vegnida lantschada l’entschatta zercladur. Tenor Marcus Weber eis ei secumprovau che la pendiculara ei vegnida en funcziun era uonn pli baul che quellas d’auters menaschis.

Renovaziun va fin

«La renovaziun dall’infrastructura va plaun a plaun a fin. Bia da quei ch’ei vegniu fatg ils davos onns ei veseivel, aschia che nus havein remplazzau ils pilotadis dallas sutgeras e remplazzau quellas cun novs sezs», scriva Marcus Weber el rapport annual. El ritmus da dus onns acquistan las pendicularas novas maschinas da preparar pistas quei ch’ei cumbinau cun cuosts da mintgamai in miez milliun francs. Ils proxims onns eis ei previu da renovar il runal Dadens e la sutgera Parlet. Cun sia strategia en favur dall’energia solara e hidraulica seigi il resort sin buna via da daventar igl emprem che sappi vegnir cuvretgs cumpleinamein cun atgna energia regenerabla. Persuenter vegn igl implont solar a Caischavedra renovaus, leutier vegn la participaziun all’Ovra Solara Magriel. En connex cul project d’ennevar dalla pista a val duei vegnir erigiu era in’ovra hidraulica. Marcus Weber lauda la collaboraziun cun Mustér, Sedrun ed Andermatt mo critichescha la birocrazia dil cantun en connex cun projects: «Adina dapli vegn decidiu dall’administraziun enstagl dall’executiva. Ei sefuorma in apparat d’emploiai surdimensiunau.»